Navoiyda o‘qishga kiritib qo‘yishni va’da qilgan shaxs qo‘lga olindi

U fuqarodan bu “xizmati” uchun 2 ming dollar va 20 mln so‘m olganda ushlangan.

Foto: Prokuratura departamenti

Navoiyda o‘qishga kiritib qo‘yish bilan bog‘liq firibgarlik holati fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qilmoqda.

Ma’lum qilinishicha, “Sh.A.” MChJ rahbari Sh.T. fuqaro M.Sh.ning ishonchiga kirib, uni Qirg‘izistondagi universitetga 2-bosqichdan o‘qishga kiritib qo‘yishini, keyinchalik o‘qishini O‘zbekistondagi oliy ta’lim muassasasiga ko‘chirib berishni va’da qilgan. U mazkur “xizmati” evaziga 2 ming dollar va 20 mln so‘mni olgan vaqtida departamentning Karmana tuman bo‘limi tomonidan o‘tkazilgan tezkor tadbirda ushlangan.

Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Oldinroq Sirdaryoda fuqarolarni 4 ming dollar evaziga o‘qishga kiritib qo‘ymoqchi bo‘lgan shaxs ushlangandi.

#Navoiy #o‘qishga kiritish