Madridda politsiya Ukrainadan olib chiqib ketilgan qimmatbaho buyumlarni musodara qildi

Madridda politsiya Ukrainaning tarixiy merosiga tegishli bo‘lgan va mamlakatdan noqonuniy olib chiqib ketilgan 11 ta tilla buyumni musodara qildi. Ispaniya politsiyasining 23 oktyabr, dushanba kuni e’lon qilingan press-reliziga ko‘ra, ushbu zargarlik buyumlarining umumiy qiymati 60 million yevrodan oshadi.

Hujjatda aytilishicha, operatsiya davomida besh kishi, jumladan, ikki Ukraina fuqarosi hibsga olingan. «Shu tariqa, Ukrainadan madaniy boyliklarni noqonuniy olib chiqib ketish bilan shug‘ullangan jinoiy tarmoq yo‘q qilindi», - deya ma’lumot berdi Ispaniya politsiyasi. Unga ko‘ra, zargarlik buyumlari Madridda sotuvga tayyorlab qo‘yilgan bo‘lgan.

Politsiya Madridda yashovchi Ukraina fuqarosi Ukrainadan katta tarixiy va iqtisodiy qiymatga ega bo‘lgan bir qancha tilla taqinchoqlarni sotayotganini aniqlaganidan so‘ng dastlabki tergov boshlandi.

Zargarlik buyumlarining kelib chiqishini yashirish uchun jinoyatchilar ular Ukraina pravoslav cherkoviga aloqadorligini tasdiqlovchi ukrain, ingliz va ispan tillarida soxta hujjatlar bilan birga kelgan. Tergov qilinayotgan asosiy shaxs Madridda yashovchi pravoslav ruhoniydir.

Qadimgi yunon-skif madaniyatining obektlari

Politsiya hisobotiga ko‘ra, birinchi buyum - qo‘chqor boshli oltin kamar 2021 yilda musodara qilingan. Gumonlanuvchi uni ispaniyalik tadbirkorga xususiy ravishda sotishga uringan. Tergov boshlanganidan so‘ng, politsiya erkakning boshqa shunga o‘xshash qimmatbaho buyumlari borligini aniqlashga muvaffaq bo‘ldi.

Qayd etilishicha, eradan avvalgi 8-4-asrlarda yunon-skif madaniyatiga oid zargarlik buyumlari Ukrainadan 2016 yilning mayigacha noqonuniy olib chiqib ketilgan. Ular hozir Milliy arxeologiya muzeyi va Ispaniya madaniy meros institutida o‘rganilmoqda. Ularni Ukrainadan noqonuniy olib chiqib ketish va sotishga urinish bo‘yicha tergov davom etmoqda.