O‘zbekistonda bug‘doy yetishtirish jarayoni Isroil texnologiyalari asosida nazorat qilinadi

O‘zbekiston elchisi Feruza Mahmudova Isroil qishloq xo‘jaligi va hududlarni rivojlantirish vaziri Avi Dixter bilan uchrashuv o‘tkazdi, deb xabar bermoqda «Dunyo».

Muloqot chog‘ida ikki mamlakat o‘rtasidagi qishloq xo‘jaligi sohasidagi hamkorlikning dolzarb masalalari va kun tartibi muhokama qilindi.

Isroil qishloq xo‘jaligi va hududlarni rivojlantirish vaziri Avi Dixter shu yil 7-8 sentabr kunlari Samarqand shahrida O‘zbekiston hukumati tomonidan BMTning Oziq-ovqat va qishloq xo‘jaligi tashkiloti ko‘magida o‘tkazilgan oziq-ovqat xavfsizligi bo‘yicha xalqaro konferensiya va uning natijalarini yuqori baholadi. U, shuningdek, ikki mamlakat qishloq xo‘jaligi vazirliklari o‘rtasidagi aloqalarning faol dinamikasidan mamnunlik bildirdi. 

Tomonlar o‘rtasida imzolangan anglashuv memorandumiga muvofiq, Isroil texnologiyalari asosida O‘zbekistonda bug‘doy yetishtirish jarayonlarini nazorat qilishni tashkil etish bo‘yicha kelishuvga erishildi.

Bu borada isroillik mutaxassislarning O‘zbekistonga ishchi safarini amalga oshirish masalasi hamda o‘zbekistonlik talabalarning Isroil o‘quv markazlarida malaka oshirish va amaliyot o‘tash imkoniyatlari ishlab chiqilmoqda.

Isroil tomoni, shuningdek, O‘zbekiston Qishloq xo‘jaligi vazirligi delegatsiyasining ushbu davlatga tashrifini o‘zbek tomoni uchun maqbul bo‘lgan vaqtda tashkil etishdan manfaatdorligi ma’lum qildi.