NATO bosh kotibi Kaxovka GES bo‘yicha favqulodda yig‘ilish o‘tkazadi

8 iyun, payshanba kuni NATO-Ukraina komissiyasining favqulodda yig‘ilishi bo‘lib o‘tadi, unda Kaxovka GESning portlatilishi muhokama qilinadi, deb xabar berdi NATO bosh kotibi Yyens Stoltenberg Twitter’dagi sahifasida.

Stoltenbergning so‘zlariga ko‘ra, u Ukraina tashqi ishlar vaziri Dmitriy Kuleba bilan telefon orqali to‘g‘on masalasini muhokama qilgan, u ham komissiya yig‘ilishiga qo‘shiladi. “Men Dmitriy Kuleba bilan minglab odamlarni boshpanasiz qoldirib, Ukrainada ekologik halokatga sabab bo‘layotgan Kaxovka to‘g‘oni shafqatsizlarcha vayron qilingani haqida gaplashdim”, — deb yozgan Stoltenberg. NATO bosh kotibi boshqa tafsilotlarni ma’lum qilmadi.

Kulebaning o‘zi uchrashuv uning iltimosiga ko‘ra o‘tkazilishini aytdi. "Kaxovka to‘g‘oni vayron bo‘lishi oqibatida yuzaga kelgan inqirozni yumshatish uchun Yyens Stoltenberg insonparvarlik yordamini ko‘rsatish maqsadida NATO mexanizmlaridan foydalanishga va’da berdi. Shu munosabat bilan, u ertaga mening iltimosim bilan chaqiriladigan NATO-Ukraina komissiyasining favqulodda yig‘ilishiga raislik qiladi", - deydi Kuleba.

Bir yildan ortiq vaqtdan beri Rossiya harbiylari nazoratida bo‘lgan Kaxovka GES to‘g‘oni 6 iyunga o‘tar kechasi vayron bo‘ldi. Dniproning quyi oqimida nazoratsiz suv sizib chiqishi boshlandi. Kiyev va Moskva falokatda bir-birini aybladi. Mustaqil tahlilchilar to‘g‘on tungi portlash yoki o‘q uzish natijasida ham, avvalgi zararlar tufayli ham vayron bo‘lgan bo‘lishi mumkinligini tan oldi.