O‘zbekiston va Polsha «aql markazlari» o‘rtasida hamkorlik yo‘lga qo‘yiladi

Uchrashuvda tomonlar o‘rtasida ishga solinmagan imkoniyatlardan unumli foydalanish zarurligi alohida qayd etildi. Jumladan, ikki mamlakat tahliliy idoralari o‘rtasida hamkorlik o‘rnatish, O‘zbekistonda amalga oshirilayotgan barcha sohalardagi keng ko‘lamli islohotlar bilan yaqindan tanishish, mamlakatni Polshada sayyohlik yo‘nalishi sifatida tanitish va polyak turistlari oqimini yanada ko‘paytirish masalalari xususida fikr almashildi.  Shu maqsadda CSM direktori boshchiligidagi delegatsiyaning O‘zbekistonga safarini tashkil etish taklifi bildirildi.

Shuningdek, O‘zbekiston prezidenti huzuridagi Strategik va mintaqalararo tadqiqot instituti, Markaziy Osiy xalqaro instituti va boshqa tahlil markazlari bilan hamkorlik o‘rnatish  muhimligi ta’kidlandi.

Uchrashuv natijasida joriy yil davomida O‘zbekiston talabalari ko‘pchilikni tashkil qiladigan Varshava va Vistula universitetlarida «O‘zbekiston madaniyati kunlari»ni o‘tkazish, Xalqaro munosabatlar markazi va Polshaning nufuzli OAV saytlarida O‘zbekistonda kechayotgan o‘zgarishlarga bag‘ishlangan  materiallarni e’lon qilish to‘g‘risida kelishuvga erishildi.