O‘zbekiston qutqaruvchi itlarining Turkiyadagi xizmati e’tirof etildi 

Turkiyada vayron bo‘lgan uylar ostidan odamlarni qutqarishda O‘zbekistondan kelgan maxsus o‘rgatilgan itlar muhim rol o‘ynadi. Bu haqda Anadolu agentligi yozdi. 

Qahramonmarashda sodir bo‘lgan halokatli zilzila zonasida o‘zbekistonlik kinologlarning mehnati tufayli 18 kishi qutqarildi. 

Hataydagi Antokiya shahri, Ovakent mahallasida odamlarni qidirishda ishtirok etgan kinolog Ubaydulla Ro‘zmetov Turkiyadagi tajribalarini aytib berdi. 

Ro‘zmetov tabiiy ofat hududida «Baron» laqabli it bilan ishladi. O‘zbekiston qidiruv-qutqaruv guruhida jami 5 ta it bilan kinologlar ishladi va ular vayronalar ostidan odamlarni topishga yordam berdi. 

O‘zbekistonlik qutqaruvchilar tabiiy ofat hududiga yetib borganidan darhol ishga kirishdi. Shu kuni itlar yordamida 81 yoshli ayol vayronalar ostidan qutqarib olindi. 

Ro‘zmetov birinchi marta bunday katta halokatni ko‘rganini tan oldi. 

«O‘rgatilgan itlar vayronalar ostidagi teshiklarga, qutqaruvchilar yetib bora olmaydigan tor joylarga kirishi mumkin. It vayronalar ostida odamni topsa, darhol ovoz beradi: tirik odamni topsa baland ovozda huradi, jasadni topsa ingraydi», dedi u. 

6 fevral kuni Turkiyaning janubi-sharqida magnitudasi 7 balldan ortiq bo‘lgan ikkita zilzila sodir bo‘ldi. 8 mart holatiga zilzila qurbonlari soni 46 ming kishidan oshdi.