Rossiyada Boris Nemsov xotirasiga bag‘ishlangan aksiyalar bo‘lib o‘tdi

27 fevral, dushanba kuni Moskva va Rossiyaning boshqa bir qator shaharlarida roppa-rosa sakkiz yil avval o‘ldirilgan muxolifat yetakchisi Boris Nemsov xotirasiga bag‘ishlangan aksiyalar, shuningdek, Rossiya prezidenti Vladimir Putin va Rossiyaning Ukrainaga qarshi urushiga qarshi namoyishlar o‘tkazildi.

Rossiya poytaxtida odamlar jinoyat sodir bo‘lganidan ko‘p o‘tmay Bolshoy Moskvoretskiy ko‘prigida siyosatchi o‘ldirilgan joyda paydo bo‘lgan vaqtincha yodgorlikka gullar olib kelishdi. "Sota" nashrining yozishicha, politsiya o‘tkinchilarni to‘xtatgan, biroq hibsga olinganlar yo‘q. Ilgari kommunal xizmatlar bir necha bor gullar va fotosuratlarni olib tashlagan, faollarni hibsga olgan, ammo yodgorlik qayta tiklangan. So‘nggi paytlarda rasmiylar unga tegmagan.

"Nastoyashcheye vremya" nashriga ko‘ra, Boris Nemsov xotirasiga bag‘ishlangan aksiyalar Qozon, Perm, Yekaterinburg va Novosibirskda ham o‘tkazildi. Odamlar siyosiy qatag‘on qurbonlari yodgorliklari poyiga o‘rnatilgan vaqtincha yodgorliklarga gul qo‘yishdi.

Yekaterinburgdagi Trud maydonida aholi Boris Nemsov sharafiga yodgorlik soati uyushtirdi. Sverdlovsk viloyati hokimiyati portretlar, plakatlar va shamlar olib kelishni taqiqladi, lekin gul qo‘yishga ruxsat berdi.

Barnaulda aksiya bir kun avval bo‘lib o‘tdi. Uni "Yabloko" partiyasining mahalliy bo‘limi tashkil qildi. Miting shahar markazida, Ozodlik maydonida, siyosiy qatag‘on qurbonlari yodgorligi yonida bo‘lib o‘tdi. Aksiya mahalliy hokimlik tomonidan ma’qullangan. Barnaul, ehtimol, Rossiyada rasmiylar bunday aksiyalarni o‘tkazishga ruxsat bergan yagona shahardir.

Boris Nemsov 2015 yilning 27 fevral kuni kechqurun Kremldan yuz metr uzoqlikda otib o‘ldirilgan. Sud besh nafar Checheniston fuqarosini aybdor deb topdi va uzoq muddatga ozodlikdan mahrum qildi, ular orasida kuch tuzilmalari zobitlari ham bor edi. Bular - Zaur Dadayev (qotillikning bevosita ijrochisi), aka-uka Anzor va Shadid Gubashevlar, Temirlan Eskerxanov va Xamzat Baxayev.