Turkiy tashkilot doirasida Investitsiya jamg‘armasi tashkil etiladi

Turkiyaning Istanbul shahrida Turkiy davlatlar tashkilotining (TDT) Turkiy investitsiya jamg‘armasini tashkil etish bo‘yicha tegishli bitim loyihasini ishlab chiqish uchun mas’ul bo‘lgan Ozarboyjon, Qozog‘iston, Qirg‘iziston, Turkiya va O‘zbekiston ekspertlarining navbatdagi uchrashuvi bo‘lib o‘tdi.

Foto: Dunyo AA

Turkiy investitsiya jamg‘armasi turkiy davlatlar tomonidan tashkil etilgan birinchi va asosiy qo‘shma moliya institutiga aylanadi va Turkiy davlatlar tashkilotiga a’zo davlatlarning iqtisodiy salohiyatini, ular o‘rtasidagi savdo-iqtisodiy hamkorlikni mustahkamlashga xizmat qiladi, jamg‘arma mablag‘lari esa qo‘shma loyihalarni amalga oshirishga yo‘naltiriladi.

Jamg‘arma faoliyati — tadbirkorlikni rag‘batlantirish, yangi ish o‘rinlarini yaratish, Turkiy davlatlar tashkilotiga a’zo davlatlarning ijtimoiy-iqtisodiy rivojlanishi kabi ustuvor yo‘nalishlarni o‘z ichiga oladi.

Uchrashuv yakunlari bo‘yicha har bir ishtirokchi davlatda hujjat loyihasini kelishish bo‘yicha ichki tartib-qoidalarni qisqa muddatlarda yakunlash bo‘yicha kelishuvga erishildi va rejalashtirilgan qo‘shma tadbirlar doirasida bitimni imzolashga kelishib olindi.

Turkiy investitsiya jamg‘armasini tashkil etish 2023 yilga mo‘ljallangan.

#jamg‘arma #Turkiy tashkilot