Zelenskiy va Putin Indoneziyadagi G20 sammitida ishtirok etishi kutilmoqda 

Bu haqda Indoneziyaning Birlashgan Arab Amirliklaridagi elchisi Husin Bagis so‘zlariga tayangan holda The National nashri xabar berdi. 

«Ikkalasi ham rozi bo‘lishdi. Ammo Ukraina – Rossiya urushi tufayli vaziyat murakkab», dedi Bagis. 

Agar ular noyabr oyida sammit o‘tkaziladigan Bali oroliga borsa, ikki mamlakat o‘rtasida urush boshlanganidan beri birinchi marta umumiy tadbirda birgalikda ishtirok etadilar. 

Bagis so‘zlariga ko‘ra, prezidentlarni qabul qilish uchun tayyorgarlik ishlari boshlab yuborilgan. 

«Biz ularni alohida mehmonxonalarga joylashtiramiz – biri Putin uchun, ikkinchisi Zelenskiy uchun», dedi u keskinlikning oldini olish zarurligiga ishora qilib. 

Avvalroq, Putin sammitda Rossiyaning ishtirok etishini tasdiqlagan, ammo o‘zining tashrifi haqida aniq ma’lumot bermagan edi. Rossiya prezidentining matbuot kotibi Dmitriy Peskov G20 sammitida Rossiya ishtirokini tasdiqladi, ammo format hali aniqlanmaganini aytdi. 

Zelenskiy matbuot kotibi Sergey Nikiforov Ukraina prezidentining sammitga tashrifini tasdiqlamadi. «Yo‘q, hozircha bu borada yakuniy qaror qabul qilinmadi», — dedi u. 

Noyabr oyida Indoneziyaning Bali orolida bo‘lib o‘tadigan ko‘p tomonlama forumda dunyoning 20 ta yirik iqtisodiyoti yetakchilari, shuningdek, BAA va Ukraina kabi taklif etilgan davlatlar ham ishtirok etishi kutilmoqda. 

Unda sog‘liqni saqlash, raqamli transformatsiya va barqaror energiyaga o‘tish bilan bir qatorda tinchlik masalasi ham kun tartibida birinchi o‘rinda turadi. 

1999 yilda tashkil etilgan G20 guruhi hissasiga jahon yalpi ichki mahsulotining 85 foizi, xalqaro savdoning 75 foizi to‘g‘ri keladi. Bu mamlakatlarda dunyo aholisining uchdan ikki qismi istiqomat qiladi. Bu esa forumni xalqaro iqtisodiy hamkorlikning asosiy platformasiga aylantiradi. 

Guruh global iqtisodiyot va moliyaviy barqarorlik, shuningdek, iqlim o‘zgarishi va barqaror rivojlanish bilan bog‘liq masalalar bilan shug‘ullanadi.