«Yoshlar daftari»ga kirganlarga 1,2 mln so‘mgacha kasb o‘rganish uchun oylik mablag‘ ajratiladigan bo‘ldi

Yoshlar ishlari agentligining ma’lum qilishicha, «Yoshlar daftari»ga kiritilganlarga zamonaviy kasblarni egallashi, axborot texnologiyalarini o‘rganishi va ularni xorijiy tillarga o‘qitish bo‘yicha 6 oygacha muddatli o‘quv kurslari uchun har oyda 1-4 BHM miqdorida, ya’ni 300 ming-1,2 mln so‘mgacha subsidiya ajratiladi. Subsidiya mahalladagi yoshlar yetakchisining ijobiy tavsiyasi asosida «Yoshlar daftari» jamg‘armasi mablag‘lari hisobidan qoplanadi.

Ariza beruvchi bir vaqtning o‘zida ham zamonaviy kasb yoki axborot texnologiyalar o‘quv kursi, ham xorijiy til o‘quv kursida o‘qish xarajatlari uchun subsidiya olishi mumkin.

«Yoshlar daftari»ga kiritilgan quyidagi toifadagi yoshlarga subsidiya ajratiladi:

 – oila a’zosi «Temir daftar»ga, «Ayollar daftari»ga yoki «Ijtimoiy himoya yagona reyestri» ATga kiritilgan yosh fuqaro;

– ijtimoiy himoyaga muhtoj bo‘lgan yosh fuqaro;

– boquvchisini yo‘qotgan, yetim yoki ota-ona qaramog‘idan mahrum bo‘lgan yosh fuqaro;

– I yoki II guruh nogironligi bo‘lgan yosh fuqaro;

– Mehribonlik uyi, Bolalar shaharchasi yoki oilaviy bolalar uyida tarbiyalangan yosh fuqaro;

– ishsiz yosh fuqaro;

– jazoni ijro etish muassasalaridan qaytgan yosh fuqaro.

Subsidiya ajratishni so‘rab yoshlardaftari.uz elektron platformasida ariza qoldirish mumkin.