Saylov kodeksiga qo‘shimchalar kiritiladi

Qonun loyihasida Saylov kodeksining quyidagi uchta moddasiga qo‘shimchalar kiritish nazarda tutilmoqda.

28-moddada:

• Markaziy saylov komissiyasi saylovchilarning ro‘yxatini shakllantirishda shaxsga doir ma’lumotlarga ishlov berish tartibini “Shaxsga doir ma’lumotlar to‘g‘risida”gi qonunga muvofiq mustaqil amalga oshirishini belgilash;
• saylovchilarning ro‘yxatidan saylov komissiyalari mazkur uchastka hududida yashovchi aholini uyma-uy aylanib chiqish yo‘li bilan aniqlashtirish uchun, saylov kuni ovoz berish uchun kelgan saylovchiga imzo qo‘ydirib saylov byulletenini berishda foydalanish maqsadini ko‘rsatib ushbu ro‘yxatlarni rasmga olish, video tasvirga tushirish yoki boshqa yo‘llar bilan ko‘paytirish va tarqatish, shu jumladan internet tarmog‘i va ijtimoiy tarmoqlarga barcha tanishishi mumkin tarzda, ochiq joylashtirish taqiqlanishini belgilash.

29-moddada: uchastka saylov komissiyasi binosida osib qo‘yiladigan saylovchilar ro‘yxatida har bir saylovchining faqat familiyasi, ismi, otasining ismi va tug‘ilgan yilini ko‘rsatish orqali hamma tanishib chiqishi uchun taqdim etilishini belgilash.

35-moddada: saylovchining shaxsini tasdiqlovchi hujjatini saylovchilarning ro‘yxatini aniqlashtirish, imzo varaqasini to‘ldirish, saylov byulletenini olish jarayonlarida ommaviy axborot vositalari, telekommunikatsiya tarmoqlari, shuningdek internet orqali barcha tanishishi mumkin tarzda ko‘rsatishni taqiqlash.

Bildirilishicha, qonun loyihasini qabul qilish milliy saylov qonunchiligini umume’tirof etilgan xalqaro saylov standartlari asosida yanada takomillashtirishga va fuqarolarning shaxsga doir ma’lumotlari himoyasini ta’minlashga xizmat qiladi.