Mudofaa vazirligi O‘zbekiston Puma uchuvchisiz uchish apparatini sotib olayotganini rad etdi

O‘zbekistonda bugungi kunga qadar «Puma-RQ 20» uchuvchisiz uchish apparatini sotib olish masalasi ko‘tarilmagan. Bu haqda Mudofaa vazirligi ma’lum qildi.

«O‘zbekiston qurol-yarog‘ va harbiy texnika xalqaro bozorini doimiy ravishda kuzatib boradi. Dunyoda robot tizimlari rivojlanayotgan bir paytda uchuvchisiz uchish apparatlarining kuzatilib borilishi ham bundan mustasno emas.

Hech kimga sir emaski, amerikalik uchuvchisiz uchish apparatlari ishlab chiqaruvchilari bu borada yetakchilardan biri hisoblanadi, shuning uchun ham O‘zbekistonlik mutaxassislar tomonidan ularga ma’lum qiziqish bildirilmoqda, biroq bugungi kunga qadar «Puma-RQ 20» uchuvchisiz uchish apparatini sotib olish masalasi ko‘tarilmagan», deyiladi xabarda.

Avvalroq, AeroVironment kompaniyasi AQShning tashqi harbiy sotuvi (FMS) dasturi doirasida Puma 3 AE uchuvchisiz uchish apparatlarini O‘zbekistonga yetkazib berishi ma’lum qilingandi. 

AQSh armiyasi qo‘mondonligidan 8,54 million dollarlik kelishuv bo‘yicha uchuvchisiz uchish apparatlarini yetkazib berish 2022 yil 30 noyabrgacha yakunlanishi aytilgandi. 

AQSh Mudofaa vazirligi shartnoma bo‘yicha qancha Puma 3 AE tizimi taqdim etilishini oshkor qilmagan, biroq Shephard Defence Insight bunday dronning bittasini uchuvchisiz uchish apparatlari uchun 225 000 dollarga baholamoqda. 

Puma 3 AE jangovar harakatlar zonasidagi bo‘linmalarga real vaqtda razvedka ma’lumotlarini to‘plash imkonini beradi. Qurilma quruqlikda va dengiz sharoitida ishlatilishi mumkin, uni bir kishi olib yuradi, qo‘ldan ishga tushiriladi.