Tramp Si Tszinpinni “qotil” deb atadi va undan 60 trln dollar talab qildi

AQShning sobiq prezidenti Donald Tramp Fox telekanali efirida Oq uy yetakchisi bo‘lganda Xitoy raisi Si Tszinpin bilan o‘rnatgan munosabatlariga yuqori baho berdi.

Foto: cbc

Biroq Tramp Xitoy raisi bilan yaxshi munosabatlar o‘rnatganiga qaramay, jurnalist Mariya Bartiromoning so‘zlariga qo‘shilishini aytib, Si Tszinpinni “qotil” deb hisoblashini ta’kidlab o‘tgan.

“Men ishonamanki, u menga yoqqanidek, men ham unga yoqqanman. Ha, u qotil, biroq u bilan munosabatlarimiz yaxshi edi. Biroq koronavirus kelgandan keyin bu umuman boshqa voqeaga aylandi”, deb ta’kidlab o‘tgan Fox Sunday Morning Futures ko‘rsatuvida sobiq prezident. Uning aytishicha, koronavirus Xitoy yetakchisi bilan o‘zaro munosabatlarida “burilish oni” bo‘lgan.

Siyosatchi, shuningdek, Xitoy pandemiya sababli yetkazilgan zarar uchun 60 trln dollar to‘lashi kerakligini qo‘shimcha qilgan.

Pandemiya boshlangungacha Tramp va Si Tszinpin turli xalqaro tadbirlarda muntazam yuzma-yuz uchrashib turgan. Biroq 2019 yilda Tramp xitoylik hamkasbi G20 sammitida ishtirok etmasa, Xitoyga qarshi yangi bojlar kiritishi bilan po‘pisa qilgan. Sammitga kelgan Si Tszinpin AQSh va Xitoy hamkorlikdan faqatgina yutishini, biroq “til topisha olmasa” yutqazishini aytgan.

#Si Tszinpin #Donald Tramp