Akmal Shorahmedov futbolchilik faoliyatini yakunladi

O‘zbekiston milliy jamoasi sobiq futbolchisi murabbiylik faoliyatini boshlaydi. U Toshkentning «Lokomotiv» klubida jismoniy tayyorgarlik bo‘yicha murabbiy sifatida ishlaydi. Bu haqda «Lokomotiv» klubi va O‘zbekiston milliy jamoasi sobiq shifokori Abror Pirriyev kanalida ma’lum qilgan.

«Denis Korostichenko bugun klub rahbariyati bilan bo‘lib o‘tgan uchrashuvdan so‘ng «Lokomotiv» bosh murabbiyiga aylandi. Ammo men uchun boshqa bir yosh murabbiy – jismoniy tayyorgarlik bo‘yicha yangi mutaxassis – Akmal Shorahmedovning jamoamiz murabbiylar shtabida ish boshlashi e’tiborliroq. Chunki futbolchilik faoliyatiga uzoq yillar bevosita guvoh bo‘lganim – Akmalning murabbiylik ostonasiga qadam bosishi va uning natijalari men uchun qiziq. Ilgari milliy jamoada Shorahmedovni futbolchi sifatida kuzatgan bo‘lsam, endilikda uning «Lokomotiv» murabbiyi maqomidagi natijalarining guvohi bo‘lish imkoni tug‘ildi», - deyiladi xabarda.

Ma’lumot uchun, 35 yoshli himoyachi joriy mavsum yakunlangach, Toshkentda Osiyo Futbol Konfederatsiyasining «V» toifasidagi diplomi uchun murabbiylik kurslarida tahsil olgan edi.

Eslatib o‘tamiz, «Neftchi» joriy mavsum Pro liga g‘olibi sifatida Superligaga yo‘llanma olgandi. Shorahmedov farg‘onaliklar safida 22tadan bahsda maydonga tushgan.