Murodjon Ahmadaliyev chempionlik kamarlarini himoya qildi

Murodjon Ahmadaliyev 12 raund davom etgan jangda Xose Velaskesni hakamlarning yakdil qaroriga ko‘ra mag‘lubiyatga uchratib, WBA va IBF chempionlik kamarlarini o‘zida saqlab qoldi.

Foto: DAZN

Professional boks bo‘yicha ikkinchi yarim yengil vazn (-55,34 kg) toifasida WBA va IBF kamarlari sohibi Murodjon Ahmadaliyev (10-0, 7 KO) AQShda navbatdagi jangini o‘tkazdi.

Nyu-Hempshirning Manchester shahrida Murodjon Ahmadaliyevga chililik Xose Velaskesga qarshi ringga chiqib, to‘liq raund davom etgan bahsda ochkolar evaziga (119-109) g‘alaba qozondi va o‘z kamarlarini himoya qildi. Dastlabki raundlarda Ahmadaliyev ustunlikka erishgan bo‘lsa, jangning o‘rtalaridan Velaskes ham faollik ko‘rsatdi.

Oxirgi raundlarda esa o‘zbekistonlik bokschi raqibiga nisbatan faolroq harakat qilib, o‘z g‘alabasini ta'minladi.

Rio Olimpiadasi sovrindori hisoblangan Murodjon Ahmadaliyev 2018 yilning martida «Mir boksa« promouterlik kompaniyasi bilan shartnoma imzolab, professional bokschi sifatida faoliyatini boshlagan.

Murodjon Ahmadaliyev 2020 yilning yanvarida Daniel Romanni mag‘lub etib, profi ringdagi sakkizinchi jangidayoq biryo‘la ikkita chempionlik kamariga ega chiqqandi. U 2021 yil aprelida Toshkentda bo‘lib o‘tgan jangida yaponiyalik Ryosuke Ivasani beshinchi raundda nokautga uchratib, o‘z kamarlarini himoya qilgandi.

#Murodjon Ahmadaliyev