Yuridik universitetga huquqiy fanlardan test topshirish amaliyoti joriy etiladi

Bugungi kunda Toshkent davlat yuridik universitetiga o‘qishga kirishda abituriyentlar 2 ta bo‘limdan iborat 5 ta fan majmuasidan test sinovlari topshiradi. 

Bular: 1-bo‘limda barcha yo‘nalishlar uchun majburiy 3 ta fan – Ona tili (o‘zbek, rus yoki qoraqalpoq tili), matematika va O‘zbekiston tarixi; 2-bo‘limda “yurisprudensiya” ta'lim yo‘nalishi bo‘yicha 2 ta fan – tarix va chet tili fanlari.

2023/2024 o‘quv yilidan boshlab, TDYuUga o‘qishga kirishda test sinovlarining 2-bloki, ya'ni “yurisprudensiya” bakalavriat ta'lim yo‘nalishiga mos fanlar bo‘yicha tarix fani o‘rniga huquqiy fanlarni kiritish masalasi universitet kengashida ko‘rib chiqilgan va ma'qullangan.

Bildirilishicha, mazkur taklifning joriy etilishi quyidagi qator natijalarga xizmat qiladi:

• maktab yoshidanoq bolalarni huquqiy fanlarni chuqur o‘zlashtirishga, Konstitutsiya va qonunlarni puxta o‘rganishga;
• maktablarda sifatli, xalqaro standartlarga mos yuridik darsliklarning yaratilishiga;
• huquqshunoslik fanlaridan ta'lim beruvchi o‘qituvchilarga nisbatan qo‘yiladigan talablar oshishi natijasida ularning malakasini doimiy oshirib borishi uchun mustahkam zamin yaratiladi;

TDYuUga dastlabki huquqiy bilimlarga ega yosh avlod vakillari kirib kelishiga erishiladi.

Bugungi kunda umumiy o‘rta ta'lim maktablarida 4 yil davomida yuqori sinflarda davlat va huquq asoslari hamda konstitutsiyaviy huquq asoslari fanlari o‘qitib kelinmoqda. Test savollari ushbu darsliklar asosida tuziladi.