Myanmadagi shaharning minglab aholisi harbiylar bilan janglar sababli o‘z uyini tark etdi

Shaharda hukumat qo‘shinlari va yuzlab isyonchilar o‘rtasida to‘qnashuvlar yuz bergan. Guvohlarning ta'kidlashicha, to‘qnashuvlar davomida askarlar aholi uylariga betartib o‘q uza boshlagan, keyin esa shaharni bombardimon qilishga o‘tgan. Natijada shahar deyarli bo‘shab qolgan, uning aholisi qo‘shni qishloqlarda yashirinishga majbur bo‘lgan.

Ta'kidlanishicha, shaharda hammasi bo‘lib 7,5 ming kishi yashaydi. “Men uyim harbiylar tomonidan bombardimon qilingandan keyin ham qochishni o‘ylamagandim”, deb aytgan shaharliklardan biri. Uning ta'kidlashicha, “vaziyat tobora yomonlashgani” sababli u oxir-oqibat shaharni tark etishiga to‘g‘ri kelgan.

Chin shtatida joylashgan Tantlangeda ayni vaqtda xunta va qarshilik kuchlari o‘rtasida janglar bormoqda. 2021 yil may oyidan beri harbiylar mahalliy qarshilik kuchlariga qarshi artilleriya qo‘llamoqda hamda hududni suv ta'minotidan uzib qo‘ygan. Kuzatuvchilar ma'lumotlariga ko‘ra, 2021 yil fevralda harbiylar davlat to‘ntaruvini amalga oshirgandan beri Chinda 1,1 ming fuqaro o‘ldirilgan, yana 8 ming kishi hibsga olingan. Ta'kidlanishicha, Hindiston bilan chegarada joylashgan shtatdan qo‘shni davlatga qochqinlar oqimi ko‘paymoqda.

7 sentyabrda xuntaga muxolif bo‘lgan Myanma milliy birdamligi hukumati fuqarolarni harbiylarga qarshi umummilliy qo‘zg‘olonga chaqirgan. Hukumat yetakchisi Duva Lashi mamlakatda favqulodda holat e'lon qilgan. Uning ta'kidlashicha, qarshilik otryadlari yaqin orada Myanmada xalq inqilobini amalga oshiradi.