Mahalliy OTMlardan o‘qishni ko‘chirish natijalari 6 sentyabrda e'lon qilinadi

Natijalar 6 sentyabr 16:00dan boshlab o‘qishni ko‘chirish so‘ralgan OTM rasmiy saytida e'lon qilinadi. Ariza holatini esa 5 sentyabr kuni soat 10:00dan boshlab transfer.edu.uz'dagi shaxsiy kabinetdan ko‘rish mumkin.

Oliy va o‘rta maxsus ta'lim vazirligi vakolatidagi talabalar o‘qishini ko‘chirish bo‘yicha ro‘yxatdan o‘tkazilgan arizalar (OTMlardan Oliy va o‘rta maxsus ta'lim vazirligi tizimidagi OTMlarga mos va turdosh yo‘nalishlar bo‘yicha) vazirlik komissiyasi tomonidan ko‘rib chiqildi.

Vazirlik axborotiga ko‘ra, ko‘rib chiqish natijalari ariza mualliflariga quyidagi tartibda e'lon qilinadi:

O‘qishi ko‘chirilishi tavsiya etilmagani bo‘yicha ma'lumotlar ariza mualliflarining transfer.edu.uz elektron tizimidagi shaxsiy kabinetlariga yuboriladi. Shunga ko‘ra, ushbu toifadagi talabalar 2021 yil 5 sentabr kuni soat 10:00 dan boshlab arizalarining ko‘rib chiqish natijalari bo‘yicha shaxsiy kabinetlari orqali ma'lumot olishlari mumkin.

O‘qishi ko‘chirilishi tavsiya etilgan talabalar ro‘yxati 2021 yil 6 sentabr kuni 16:00 dan boshlab talabalar o‘qishi ko‘chirilishi so‘ralgan OTMlarning rasmiy veb-saytlarida e'lon qilinadi.

O‘qishi ko‘chirilishi tavsiya etilgan talabalarning bazaviy yoki tabaqalashtirilgan to‘lov-kontrakt asosida ko‘chirilishi muayyan OTM tomonidan uzrli sabablarni asoslovchi hujjatlarning asli ko‘rib chiqilgandan so‘ng belgilanadi.

#OTM #o‘qishni ko‘chirish #talaba