Surxondaryodan giyohvandlik moddalari olib ketayotgan farg‘onalik shaxs Qashqadaryoda ushlandi

Surxondaryo viloyati Denov tumanidan giyohvandlik moddalari olib uyiga ketayotgan farg‘onalik shaxs Qashqadaryoda ushlangan. Bu haqda Qashqadaryo viloyati IIB axborot xizmati xabar bermoqda.

Ma'lum qilinishicha, 2021 yil 12 avgust kuni Farg‘ona viloyati Uchko‘prik tumanida yashovchi I.M. boshqaruvida bo‘lgan «Damas» mashinasi Chiroqchi tumanida joylashgan «Umakay» YPX maskanida to‘xtatilgan. Mashina saloni xolislar ishtirokida ko‘zdan kechirilganda unga ortilgan qishloq xo‘jaligi maxsulotlari solingan qoplar ustida turgan elektron tarozining ko‘rsatkich qismi (tablosi)da 5 dona oq rangli yelim paket bo‘laklariga o‘ralgan, o‘tkir hidli giyohvandlik moddasi topilgan va tegishli tartibda rasmiylashtirib olingan.

Haydovchi I. M.dan mazkur jinoyatga aloqador boshqa ashyolar bor-yo‘qligi so‘ralganda u o‘z ixtiyori bilan avtomashinaning rul qismi va old o‘rindig‘i tagidan o‘tkir hidli giyohvandlik moddasiga o‘xshash moddalarni olib IIB xodimlariga taqdim etgan.

Dastlabki surishtiruvda M.I. mazkur giyohvandlik moddalarini joriy yil 11 avgust kuni Surxondaryo viloyati Denov tumanida yashovchi U.N.dan olgani va Qo‘qon shahriga olib bormoqchi bo‘lgani aniqlangan.

Qayd etilishicha, I. M.dan olingan gashish giyohvandlik vositasining og‘irligi 1 kilogramm 47 grammni, opiy giyohvandlik vositasining og‘irligi esa 4,8 grammni tashkil etgan.

Ta'kidlanishicha, mazkur holat yuzasidan jinoyat kodeksining tegishli moddalari bilan jinoiy ish qo‘zg‘atilib, hozirda tergov harakatlari olib borilmoqda.