Ellikqal'ada noma'lum sabablarga ko‘ra yonib ketgan 440 bosh qo‘y va echki haqida yangi tafsilotlar ma'lum bo‘ldi

Ellikqal'a tumani «Ellikqal'a» OFYda istiqomat qiluvchi Ahmad Niyazimbetovga tegishli qo‘radagi 440 bosh qo‘y-qo‘zilari va echki-ulog‘i bilan yonib ketdi. Bu haqda Qoraqalpog‘iston Respublikasi prokuraturasi ma'lum qildi. 

Ta'kidlanishicha, holat 22 mart kuni sodir bo‘lgan. Qo‘y-echkilarning yonib ketish sabablari noma'lumligi aytilmoqda. 

Tuman IIBga ko‘ra, voqea 22 martdan 23 mart kuniga o‘tar kechasi sodir bo‘lgan. Yong‘in chiqqan hudud qumlik orasidagi do‘nglikda joylashgan. 1-1,5 metr balandlikda yog‘och va simlar bilan o‘rab yasalgan qo‘y qo‘ra ichida boqib kelayotgan 250 bosh qo‘y-qo‘zilari va echki-uloqlari yonib ketgan. 

Yong‘in sodir bo‘lgan kuni Ahmad Niyazimbetov qo‘y va echkilarini beruniylik Ongarov Umirzokqa ko‘z quloq bo‘lib, boqish uchun topshirgan. O‘sha vaqtda u  yong‘in kelib chiqqan qo‘y qo‘radan taxminan 15-20 metr chamasidagi uzoqlikda joylashgan ko‘chma vagon ichida yolg‘iz o‘zi bo‘lgan.

Voqea joyi ko‘zdan kechirilganida ko‘chma vagon ichkarisida isinish va ovqat pishirish uchun o‘choq borligi aniqlangan. Shu kuni unda o‘t yoqilgan, deyiladi Ellikqal'a tumani ichki ishlar bo‘limi xabarida.

Hozirda Ahmad Niyazimbetovning yaqin qarindoshlari, uning do‘stlari, yong‘in kelib chiqqan qo‘y qo‘raga yaqin masofada yashovchi fuqarolar hamda muqaddam sudlangan shaxslar bilan operativ surishtiruv ishlari olib borilmoqda. 

Ellikqal'a tumani IIB tomonidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.