Qirg‘izistondan chorva olib o‘tiladigan maxsus o‘tkazish punkti loyihasi taqdim qilindi

Go‘sht mahsulotining narxiga chetdan olib kiriladigan chorva soni ham ta'sir qiladi. Rasmiy statistikaga ko‘ra, o‘tgan 2020 yil davomida Qirg‘izistondan Namangan viloyatiga 10 801 bosh qoramol olib kirilgan. 

Namanganga Jalolobod viloyati gubernatori boshchiligida tashrif buyurgan delegatsiya bilan bo‘lib o‘tgan biznes-forum davomida chegara orqali chorva olib o‘tishga mo‘ljallangan maxsus punkt loyihasi taqdim qilindi.

“Kirgiz eko eksport“ korxonasi bosh direktori Ulan Maksimobekovga ko‘ra, bu loyiha ikki bosqichdan iborat bo‘lib, birinchi bosqichida chorva mollari bo‘yicha sanitariya post, veterinariya tekshiruvi, laboratoriya, mol so‘yadigan joylarni hamda teri va junni qayta ishlov sexlari qurishni o‘z ichiga oladi.

Bu maskan Olabuqa tumani Qizilqo‘l uchastkasidan Kosonsoy tumaniga o‘tishda tashkil etiladi. Tashkil etiladigan joy Kosonsoy shahridan 4 km yuqorida joylashgan. 

Mazkur loyihaga 20 gektar yer ajratilgan bo‘lib, yer bilan bog‘liq hujjatlar to‘liq tayyor holatga keltirilgan. 

Ulan Maksimobekovning aytishicha, hozirgi kunda suv, elektr energiyasi va boshqa muammolar hal etilmoqda.

"Xudo xohlasa chegaralar ochilishi bilan, bizning loyiha ham ikki viloyat kelushuvlari negizida amalga oshadi deb ishonamiz", - deydi loyiha taqdimotchisi. 

Loyihaning asosiy maqsadi - chorva mollarini boshqa yuklarga aralashmagan holda olib o‘tishdan iborat.

Bosh direktorning so‘zlariga ko‘ra, Bugungi kunda Jalolobod viloyatida 380 mingdan oshiq qoramol, 1.5 mln.dan ortiq mayda jonliqlar (qo‘y, echki)  va  200 mingdan oshiq yilqi mavjud.