AQSh va Xitoy diplomatlari Alyaskadagi uchrashuvda bir-birini jiddiy aybladi

Alyaska shtatining Ankorij shahrida 18 mart oqshomida bo‘lib o‘tgan uchrashuvda AQSh davlat kotibi Entoni Blinken Xitoyni kiberhujumlar, Vashingtonning hamkorlarini iqtisodiy shantaj qilish, Hongkongda inson huquqlarini buzish va uyg‘urlarni ta'qib qilishda aybladi. U, shuningdek, AQShning Xitoyga munosabati kerak bo‘lsa raqobatchi, kerak bo‘lsa hamkorlik asosida, kerak bo‘lsa dushmanlarcha bo‘lishini ta'kidladi. «Pekinning ishlari global barqarorlikka tahdid solmoqda», deydi Blinken.

Xitoy tomonidan Xitoy kommunistik partiyasi markazqo‘mi tashqi ishlar bo‘yicha kanselyariya rahbari Yan Tszechi bunga xitoy tilida irod qilingan 15 daqiqalik nutqda AQShdagi zaiflashib borayotgan demokratiya, ozchilikni ta'qib qilish va AQShning tashqi va savdo siyosatini tanqid qildi. «Sizlar normal savdo almashinuviga xalal berish uchun milliy xavfsizlik kabi tushunchalarni suiiste'mol qilyapsizlar va ayrim davlatlarni Xitoyga hujum qilishga gij-gijlayapsizlar», degan u AQShdagi politsiyaning zo‘ravonliklari, irqchilik va afroamerikaliklarning huquqlarini himoya qiluvchi Black Lives Matter harakatini yodga solib.

Odatda bir necha daqiqa davom etadigan salomlashuv nutqlari bir soatlik «jang»ga aylanib ketdi. Ikkala davlat delegatsiyalari ham mubohasaga kirishib ketganidan, jurnalistlar zalni tark etishga majbur bo‘lishdi. AQSh vakili Xitoy tomonini 2 daqiqa davom etishi kerak bo‘lgan kirish nutqini cho‘zish orqali protokolni buzishda aybladi.

Uchrashuv natijalariga ko‘ra, AQSh delegatsiyasi Ankorijda bo‘lib o‘tgan AQSh-Xitoy muzokaralarining ilk sessiyasi «dolzarb, jiddiy va oshkora» bo‘lgani, har ikki taraf ham o‘z manfaat va prioritetlarini ifoda eta olganlarini ma'lum qilgan. «Biz rejalashtirganimizdek o‘z manfaat va prioritetlarimizni ifoda qilishda foydalandik va xitoylik hamkasblarimizdan ham xuddi shuni eshitdik», degan AQSh degegatsiyasi vakili Reuters agentligiga bergan intervyusida.