Sherzod Hidoyatov uy-joy kommunal xizmat ko‘rsatish vaziri bo‘ladi

Sherzod Hidoyatov 2019 yil sentyabridan buyon Qurilish vazirining birinchi o‘rinbosari vazifasida ishlab kelayotgandi. U 2018 yil aprelidan buyon ushbu lavozimida ishlab kelgan Botir Zokirov prezident farmoni bilan qurilish vaziri etib tayinlanishi ortidan vazirlikka kelgandi.

6 yanvar kuni faoliyatida kamchiliklarga yo‘l qo‘ygani uchun qurilish vaziri Botir Zokirov prezident tomonidan ogohlantirilgani xabar qilingan edi. Shuningdek, ushbu yig‘ilishdan so‘ng davlat rahbarining 5 yanvardagi farmoniga binoan uy-joy kommunal xizmat ko‘rsatish vaziri Muzaffar Soliyev ishdan olingandi.

Sherzod Hidoyatov 1980 yil 20 avgustda Toshkent shahrida tug‘ilgan. 2006 yilda Toshkent davlat texnika universitetini tugatgan.

Mehnat faoliyatini 1998 yilda O‘zbekiston Respublikasi Oliy xo‘jalik sudining Tashkiliy-nazorat boshqarmasi umumiy bo‘limida nusxa ko‘chirish bo‘yicha nozirlikdan boshlagan. Turli yillarda bir qator korxona va tashkilotlarda mehnat qilgan. Xususan, O‘zbekiston Respublikasi Oliy xo‘jalik sudining Tashkiliy-nazorat boshqarmasida turli vazifalarda, «NORDLINK ALIMINIUM BUILDING MATERIALS» mas'uliyati cheklangan jamiyati xorij korxonasi direktorining o‘rinbosari, «DREAM PRODUCTION» mas'uliyati cheklangan jamiyat shaklidagi qo‘shma korxonasi direktori, «Toshkent transformator zavodi» aksiyadorlik jamiyati bosh direktori, «DURABEL BETON» mas'uliyati cheklangan jamiyati direktori lavozimlarida faoliyat yuritgan.

2018 yil mayida Toshkent shahri hokimiga aylangan Jahongir Ortiqxo‘jayev o‘rniga «Tashkent city» xalqaro ishbilarmonlik markazi hududida obektlarni qurish va ulardan foydalanish direksiyasi direktori etib tayinlangan.