Uzun navbatlar va 200 yevrolik testlar: Yevropadagi xalqaro aeroportlar karantindan so‘ng qanday ishlaydi?

Yevropadagi xalqaro aeroportlar rahbarlari koronavirus sababli joriy etilgan xavfsizlik choralariga rioya qilinishi aeroport va aviakompaniyalarning butunlay yopilishidan kam bo‘lmagan miqdorda moliyaviy zarar keltiradi, deb hisoblamoqda.

Xitrou aeroporti, London

400 kishini (jambo-jyetlar sig‘imi) bir-biridan 2 metr masofada tutib turish bir kilometrlik navbatga olib keladi, deydi Xitrouning Londondagi ofisi rahbari Jon Xolland-Key Bloomberg bilan suhbatda. Ijtimoiy masofalanish aeroportning o‘tkazuvchanlik salohiyatini 20 foizga kamaytiradi.

Xolland-Keyning aytishicha, yo‘lovchilarni terminalga kirishda koronavirusga tekshirish oqilona yo‘l bo‘ladi. U vaksina paydo bo‘lguniga qadar unday tartibda ishlashning imkonsiz, deb hisoblamoqda. 

Reyn-Mayn aeroporti, Frankfurt

Frankfurt aeroportida odamlar bir-biridan kamida 1,5 metr masofada bo‘lishlari uchun yuk berish va nazorat-o‘tkazuv punktlari hududi qaytadan loyihalandi. Polga maxsus belgilar chizildi, yuzlab plakat va ekranlar ehtiyot choralari haqida eslatib turadi. Har besh daqiqada bir necha tilda masofalanish qoidalari to‘g‘risida e'lon qilib turiladi.

Qoidalarga rioya qilinishi aeroport xodimlari tomonidan nazorat qilinadi. Butun bino bo‘ylab dezinfeksiyalovchi vositalar joylashtirilgan, xodimlar va mijozlar o‘rtasiga esa plastik to‘siqlar o‘rnatilgan.

Sxipxol aeroporti, Amsterdam

Sxipxolda har ikkinchi ro‘yxatga olish ustuni va samolyotga chiqish yo‘li yopilgan, har bir reysdagi yuklar uchun alohida konveyer lentasi ajratiladi.

Frans-Yozef Shtraus nomidagi aeroport, Myunxen

Myunxen aeroportida niqoblar, gigiyenik salfetkalar va bir martalik qo‘lqoplar sotiladigan avtomat o‘rnatilgan.

Xelsinki-Vantaa aeroporti, Xelsinki

Xelsinki aeroportida niqobi yo‘qlarga niqob beriladi va yo‘lovchilarni kutib olgani kelganlardan o‘z avtomobillarida qolish yoki vaqtincha ishlamayotgan terminalda kutish so‘raladi.

Sharl-de-Goll aeroporti, Parij

Terminallar har kuni kechqurun dezinfeksiya vositalari bilan tozalanadi. Liftga faqat uch kishi kirishi mumkin. Parij aeroporti bir soniyada 16 kishining haroratini o‘lchaydigan Xitoyda ishlab chiqarilgan uskunalarni sinovdan o‘tkazmoqda.

O‘zini noxush his qilgan yo‘lovchilar tibbiy ko‘rikdan o‘tishi va koronavirusga test topshirishi mumkin.

Vena-Shvexat aeroporti, Vena

Vena aeroportida molekulyar-biologik test topshirgan yo‘lovchilar 14 kunlik karantinga joylashtirilmaydi. Aeroportdan uchib ketayotgan yo‘lovchilar testdan o‘tkaziladi va sog‘lomligini tasdiqlovchi hujjat oladi.

Testdan o‘tish uchun avvaldan buyurtma beriladi, natija uch soatga yaqin vaqt ichida chiqadi. Test topshirish narxi 190 yevroga teng.