Xokkey afsonalariga Toshkentdan yangi xonadonlarning kaliti topshirildi

Sir emaski, bugungi kunda xalqimiz salomatligini mustahkamlash, aholining turli qatlamlari orasida sog‘lom turmush tarzini keng targ‘ib etishga alohida e'tibor qaratib kelinmoqda. Shu bilan birga, professional sportdagi g‘alabalarimiz salmog‘ini oshirish ham ustuvor vazifalardan biriga aylangan. Bu jarayonda nafaqat Olimpiya va milliy, balki qishki sport turlari, xususan xokkeyni yanada rivojlantirish va ommalashtirishga jiddiy ahamiyat berilmoqda.

Shu maqsadda o‘tgan yili ilk marotaba xokkey bo‘yicha tarixiy birinchi O‘zbekiston chempionati zo‘r muvaffaqiyat bilan tashkil etildi. Toshkentda «Humo Arena» ko‘p tarmoqli muz saroyining barpo etilishi esa ushbu sport turi taraqqiyotida muhim jarayon bo‘ldi. Joriy mavsumdan boshlab «Humo» xokkey klubi Oliy xokkey ligasi bahslarida ishtirok etib kelmoqda. Garchi nufuzli musobaqada o‘zining ilk mavsumini o‘tkazayotgan bo‘lishiga qaramay poytaxt jamoasi amalda muntazam chempionatning pley-off bosqichiga yo‘llanmani naqd qilib qo‘ydi.

«O‘zbekiston Respublikasida qishki sport turlarini yanada rivojlantirish chora-tadbirlari to‘g‘risida»gi Prezident Qarori esa mamlakatimizda qishki sport turlarini rivojlantirishda yangi davrni boshlab beradi, desak mubolag‘a bo‘lmaydi. Mazkur qarorning muhim bandlaridan biri – qishki sport turlari bo‘yicha chet eldan taklif qilinayotgan mutaxassislarning xizmat uylari bilan ta'minlanishidir. Bu esa xorijlik malakali trener va mutaxassislarni yurtimizga jalb etishda muhim omil bo‘lib xizmat qiladi.

Darvoqe, «Humo Arena» ko‘p tarmoqli muz saroyining ochilish marosimida ishtirok etgan Prezidentimiz Shavkat Mirziyoyev ushbu tadbirga mehmon sifatida tashrif buyurishgan rossiyalik xokkey yulduzlariga poytaxtimizdan uy-joy berishni, toki «ular Toshkentga mehmon bo‘lib emas, balki o‘z uyiga kelgandek bo‘lishsin», degan taklifni bergandi.

Shu munosabat bilan bugun poytaxtimizdagi Dream City kompaniyasi ofisida tadbir o‘tkazildi. Unga nafaqat rus, balki dunyo xokkey afsonalari ham taklif etilgandi. Tadbirda Toshkent shahar hokimining o‘rinbosari Sharof Rahmonov ham ishtirok etdi va dastlabki uyning kalitini ikki karra Olimpiya chempioni, ko‘p karra Yevropa va jahon chempioni Aleksandr Yakushevga topshirdi.

So‘ngra Jismoniy tarbiya va sport vaziri Dilmurod Hamidullayyevich Nabiyev ham so‘zga chiqib, rus xokkeyi afsonalarini yana bir bora yurtimizda ko‘rib turganidan mamnunligini ta'kidladi. Qolaversa, bugungi marosimdan keyin bu xokkey yulduzlari yurtimizga tez-tez kelib turishi va o‘z bilimlarini yoshlar bilan o‘rtoqlashishi, bu esa mamlakatimizda xokkey sportining jadal rivojlanishiga xizmat qilishini aytib o‘tdi. O‘z navbatida Dilmurod Nabiyev Olimpiya o‘yinlari g‘olibi, «Stenli kubogi» sohibi va uch karra jahon chempioni Valeriy Kamenskiyga yangi uyning kalitini taqdim etdi.

Shuningdek, tadbirda xokkey afsonalari Aleksey Jamnov va Vitaliy Proxorovlarga ham Toshkentdagi ko‘rkam uylardan taqdim etildi. Marosimda so‘zga chiqqan V.Kamenskiy bu ehtiromdan boshi ko‘kka yetgani va bunday voqea uning hayotida ilk marotaba kuzatilganini ta'kidlab, buning uchun hukumatimizdan minnatdor ekanini bildirdi.