Birinchi nemis fazogiri Zigmund Yyen hayotdan ko‘z yumdi

Germaniyada 82 yoshda birinchi nemis fazogiri Zigmund Yyen hayotdan ko‘z yumdi. Bu haqda Deutsche Welle nashri xabar berdi.  

Zigmund Yyen 1978 yil 26 avgustda fazoga parvoz qilgan birinchi nemis bo‘lgan. U “Interkosmos” dasturi bo‘yicha sobiq ittifoq fazogiri Valeriy Bikovskiy bilan birga “Soyuz-31” kemasida “Salyut-6” orbital stansiyasiga parvoz qilgan. Fazogir Yerga qaytgach, sobiq ittifoq va Germaniya Demokratik Respublikasi qahramoni unvonini olgan. Germaniya birlashgach esa Germaniya aerokosmik markazi va Yevropa koinot agentligi bilan hamkorlik qilgan. Yyen 2002 yilda pensiyaga chiqqan. Berlin yaqinidagi Shtrausberg aholi punktida yashagan.

Koinotga uchgan ikkinchi nemis fazogiri 1983 yilda G‘arbiy Germaniyadan Ulf Merbold bo‘lgan.

“Interkosmos” dasturi mavjud bo‘lgan vaqtda sobiq ittifoq bilan do‘st tutingan bir qator davlatlar: Chexoslovakiya, Polsha, Bolgariya, Vengriya, Vetnam, Kuba, Mo‘g‘uliston, Ruminiya, Suriya va Afg‘oniston  vakillari koinotga uchishga muvaffaq bo‘lishgan.