EVO provayderi 1 martdan raqobat oqibatida qator hududlardagi faoliyatini to‘xtatadi

«EVO» savdo belgisi («Super iMax» MChJ rahbariyati) Navoiy, Buxoro, Qarshi va Namangan hududlaridagi faoliyatini to‘xtatishga qaror qildi.

Kompaniya vakillarining so‘zlariga ko‘ra, ushbu hududlarda provayder faoliyati to‘xtatilishiga sabab sifatida bozorning qayta shakllantirilishi, ma'lumotlar uzatish xizmatlari bozoridagi operatorlar tomonidan qattiq raqobat, raqobat oqibatida yangi abonentlar oqimining qisqarishi va qayd etilgan hududlarda moddiy-texnik ta'minot qoplanishi o‘zini oqlamayotgani ko‘rsatilgan.

Radiochastotalar va IP transport ijarasiga sarflangan xarajatlari simli ma'lumot uzatish operator, provayderlarnikidan tubdan farq qiladi, kompaniya vakillariga ko‘ra, EVO boshqa hududlardagi faoliyati va xizmat turlarini yaxshilaydi. Kompaniya rahbariyati tomonidan tuzilgan jamoa EVO abonentlarining boshqa provayderlar (TPS va EAST TELECOM) tarmoqlariga o‘tishida yordam beradi. EVO yordam uchun ushbu raqamga qo‘ng‘iroq qilishni tavsiya etadi: +998 78 148 00 00. 

Ma'lumot uchun, EVO savdo belgisi Yaponiyaning Sumitomo Corporation va Koreya Respublikasining KT Corporation kompaniyalari hamkorligida ochilgan «Super iMax» MChJga qarashlidir.

Provayder LTE TDD va WiMAX simsiz ma'lumot uzatish texnologiyasidan foydalanadi. Tarmoq topologiyasi mobil aloqa operatorlariniki bilan o‘xshash bo‘lib, provayder ma'lumotlar uzatilishida radiochastotalardan foydalanadi.

Eslatib o‘tamiz, O‘zbekistondagi yirik aloqa operatorlaridan biri «O‘zbektelekom» AK o‘tgan yil noyabr oyi oxirida tezlik masalasi muayyan provayder yoki operator tarmog‘ining texnologiyalari va texnik imkoniyatlariga bog‘liqligi haqida xabar bergandi. O‘tgan yil dekabr oyi boshida ISTV provayderi «O‘zbektelekom»ni monopoliyaga intilishda ayblagandi.

Ma'lumot uchun, O‘zbekiston internetga ulanish tezligi bo‘yicha dunyo reytinglarida so‘nggi pog‘onalardan birida turadi. SpeedTest’ning 2018 yil dekabr oyi reytingiga ko‘ra, O‘zbekiston mobil internet tezligi bo‘yicha 111-o‘rin (9.97 mb/s) va simli tarmoq orqali ulanish bo‘yicha 108-o‘rinda (10.11 mb/s) joylashgan.

SpeedTest reytingida mobil internet tezligi bo‘yicha 72.77 mb/s tezlik bilan Islandiya, simli tarmoq orqali ulanish bo‘yicha 190.94 mb/s tezlik bilan Singapur birinchi o‘rinda turadi.