Universitetda o‘qigan birinchi o‘zbek qizi

Foto: ziyouz.uz

Birinchi o‘zbek kimyogar olimasi Zarifa Saidnosirova universitetda tahsil olgan ilk o‘zbek qizidir.

Bu haqda uning o‘zi shunday yozgan: “Men matematika, fizika, kimyodan 5, 6, 7-sinflarga dars bera boshladim. Shu orada SAGUga – O‘rta Osiyo Davlat dorilfuniniga o‘qishga kirdim. Men fizika-matematika fakultetining kimyo sho‘'basiga kirdim. Men SAGUga o‘qishga kirgan birinchi o‘zbek qizi edim. Kirish imtihoni nihoyatda qattiq o‘tdi. Katta bir komissiya oldida fizika, kimyo, rus tilidan imtihon topshirdim. Endi men ham muallima, ham talabaman! Maktab bilan dorilfunun o‘rtasida yelib-yuguraman... O‘rtada rasm studiyasiga qatnayman...»

Taniqli adib Oybekning rafiqasi, oilaparvar ayol va mehridaryo ustoz bo‘lgan Zarifa Saidnosirova “Oybegim mening” nomli kitobi bilan adabiyot ixlosmandlarining mehru hurmatiga musharraf bo‘lgan.

Uning mohir rassom bo‘lgani, 1925 yilda moyli bo‘yoqlar bilan Ahmad Yassaviy maqbarasining oldi, orqasi va ikki yon tarafini tasvirlovchi suratlar chizgani ma'lum. Shulardan biri – maqbaraning yon ko‘rinishi aks ettirilgan surat hozirda Oybek uy-muzeyida saqlanmoqda.

#universitet #Zarifa Saidnosirova