Olmaotada yosh bolaning oshqozonidan taxminan 40 ta magnit chiqarib olindi

Olmaota shahrida shifokorlar besh yoshli bolaning oshqozonidan taxminan 40 ta magnit sharchasini topishdi, deb xabar bermoqda «Kazinform».

Tibbiyot xodimlarining so‘zlariga ko‘ra, bola Olmaota shoshilinch yordam bolalar markaziga qornidagi kuchli og‘riqlar bilan olib kelingan.

Rentgen surati bolaning oshqozonida kutilmagan narsalar borligini ko‘rsatgan. Keyinchalik aniqlanishicha, bu 38 ta magnit sharchasi bo‘lgan.

"Biz kindik orqali ichakni va o‘sha magnit sharchalarini chiqarib oldik", - deya aytib o‘tishdi shifokorlar.

Ayni damda bola jonlantirish bo‘limida qolayotgani aytiladi.

Eslatib o‘tamiz, O‘zbekistonda yanvar oyida tanasidan 16 ta igna va sim bo‘lagi topilgan chaqaloq haqida xabarlar keng tarqaldi. 11 oylik chaqaloqning tanasidan topilgan ignalar bo‘yicha huquqni muhofaza etuvchi organlar tomonidan dastlabki surishtiruv ishlari boshlangan. Kun.uz muxbiri bilan suhbatlashgan ichki ishlar xodimi surishtiruv jarayonida ilgari surilayotgan farazlarni ma'lum qilgan.