Havayidagi soxta trevogadan keyin odamlar o‘z “taassurotlari” bilan bo‘lishdilar

13 yanvarda Havayida shtat tomon ballistik raketa uchayotgani haqida trevoga e'lon qilingandi. Odamlarga iloji boricha tezroq boshpana topish buyurilgan va bu mashg‘ulot trevogasi emasligi ma'lum qilingan. Keyinroq aniqlanishicha, bu ogohlantirish xatolik tufayli berilgan. Biroq u aholi o‘rtasida “kattagina” vahima ko‘tarilishiga sabab bo‘lgan. Odamlar trevogadan keyin o‘zlarini qanday tutganlari haqida so‘zlab berishdi.

Jurnalist Sara Donsheyning aytishicha, u vahimaga tushgan qarindoshlarining xabaridan uyg‘onib ketgan. “Oilam shimoliy sohilbo‘yida edilar. Ular garajga berkinib olishgan. Mening onam va singlim yig‘lardi. Aniqlanishicha, soxta trevoga bo‘lgan, biroq ko‘plab odamlar vahimaga tushdilar”, deb yozgan jurnalist tvitterda.

Gollivud aktyori Jim Kerri esa bu ogohlantirishni “aqldan ozdirgudek” deb atadi. “Men Havayida edim. Uyg‘onib ketib, 10 daqiqalik hayotim qolganini angladim”, deb yozgan Kerri.

Mahalliy deputat Mettyu Loprestining aytishicha, u xabarni jiddiy qabul qilgan va uning uyi yadroviy zaryad ta'siri radiusida bo‘lishi mumkinligini o‘ylab, vahimaga tushgan. “Biz farzandlarimiz bilan vannaxonaga berkinib oldik va Tangriga iltijo qilardik. Men yaqinlarim va tanishlarimga qo‘ng‘iroq qilib, ularga boshpana topishlari kerakligini aytardim”, deb eslagan bo‘lib o‘tgan voqeani deputat. 

Mahalliy Star Advertiser nashri jurnalistlarining yozishicha, ogohlantirishdan keyin Havayi poytaxti Gonoluluning bosh shossesida mashinalar harakatlanishdan to‘xtab, haydovchilar mashinalarini tark etib, tunnel ichiga va ko‘priklar ostiga yashirina boshlashgan.

Trevoga yolg‘on ekanligi haqidagi xabar 38 daqiqadan keyingina yuborilgan. Shtat gubernatori Devid Ayj ushbu voqea uchun aholidan uzr so‘ragan va u favqulodda xizmat xodimlaridan birining xatosi tufayli yuz berganini aytgan. Ayjning aytishicha, ushbu xodim ogohlantirish tizimi sinovdan o‘tkazilishi vaqtida “haqiqiy ogohlantirish tugmasini” bosib yuborgan.

AQSh prezidenti Donald Tramp ushbu vaziyatga izoh berib, raketa hujumlari haqida yolg‘on xabarlar boshqa takrorlanmasligiga umid bildirishini aytgan.