Matbuot va axborot agentligida bolalar adabiyotiga bag‘ishlangan tadbir bo‘lib o‘tdi

8 noyabr kuni O‘zbekiston Matbuot va axborot agentligining katta majlislar zalida «Bolalar adabiyoti: muammolar va istiqbol» mavzuidagi ilmiy-amaliy seminar hamda «O‘zbek bolalar adabiyoti antologiyasi» kitobining taqdimoti bo‘lib o‘tdi. Tadbirni O‘zbekiston Matbuot va axborot agentligi Bosh direktorining birinchi o‘rinbosari Sobir Sayfiyevich Shukurov ochib berdi. 

2017 yilning 8 sentabrida qabul qilingan «Bolalarni ularning sog‘lig‘iga zarar yetkazuvchi axborotdan himoya qilish to‘g‘risida»gi O‘zbekiston Respublikasi Qonuni va 2017 yiling 13 sentabrida «Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ib qilish bo‘yicha kompleks chora tadbirlar dasturi to‘g‘risida»gi Prezidentimiz Qarori e'lon qilingandi. Mazkur qonun va qaror doirasida bugun kunda O‘zbekiston Matbuot va axborot agentligi ko‘pgina ishlarni amalga oshirmoqda. O‘zbekiston Yozuvchilar uyushmasi, O‘zbekiston Fanlar akademiyasi bilan hamkorlikda o‘tkazilgan ushbu seminar ham mazkur ishlarning bir qismidir. Ilmiy-amaliy seminarda bugungi kunda bolalar uchun yaratilayotgan adabiyotlar, ularning saviyasi kabi ko‘plab masalalar muhokama qilindi. 

O‘zbekiston Fanlar akademiyasidan adabiyotshunos olim Rahmatilla Barakayev, O‘zbekiston Yozuvchilar uyushmasidan adib Erkin Malik va Cho‘lpon nomidagi NMIU bosh muharriri Davron Ulug‘murodov bugungi kun bolalar adabiyoti va uni chop etish muammolari to‘g‘risida o‘z mulohazalarini bildirib ma'ruza qilishdi.

Ilmiy-amaliy seminar yakunida Cho‘lpon nomidagi NMIU tomonidan chop etilgan «O‘zbek bolalar adabiyoti antologiyasi» kitobining taqdimoti bo‘lib o‘tdi. Tadbirda X.To‘xtaboyev, Anvar Obidjon, Iqbol Mirzo kabi taniqli adiblar hamda Alisher Navoiy nomidagi O‘zbek tili va adabiyoti universiteti o‘qituvchilari va talabalari ishtirok etishdi.