Video: Hakam bu holat uchun Sadio Manega qizil kartochka ko‘rsatib to‘g‘ri qildimi?

«Manchester Siti» – «Liverpul» o‘yini vaqtida mehmonlar hujumchisi Sadio Manega ko‘rsatilgan qizil kartochka Angliya matbuotida keng muhokama qilinmoqda va aksariyat futbol ekspertlari o‘sha vaziyat uchun Mane maydondan chiqarib yuborilmasligi kerak edi, deb hisoblashmoqda. 

O‘sha vaziyatda «Liverpul» hujumchisi to‘p uchun kurashda oyoqlarini baland ko‘targan holda chiqib borgan va mezbonlar darvozaboni Edersonning yuziga og‘ir jarohat yetkazgandi. 

«Hakam o‘zini yo‘qotib qo‘ydi» – deb hisoblaydi Sky Sport eksperti Terri Anri, - «maydon markazida bunday to‘qnashuvlar juda ko‘p bo‘ladi, ammo qizil kartochka ko‘rmaymiz, to‘g‘rimi? Bu haqiqiy kurash edi, har ikki futbolchi oxirigacha borishga majbur edilar. Menimcha, hakam yiqilib yotgan Edersonni ko‘rib, qo‘rqib ketdi».

Gari Nevill ham Anrining fikrlariga qo‘shildi va bunday vaziyatlarda maksimum sariq kartochka ko‘rsatish kerakligini aytdi.

Yana bir mashhur mutaxassis Gari Lineker esa, yanada keskinroq bo‘ldi: «Hakamning qarori – ahmoqlik» deb yozdi u o‘z tvitter sahifasida. 

Mashhur hakam Mark Klattenburg ham ushbu vaziyat haqida o‘z fikrini bayon qildi:
«Jonatan Mossning bu qaroriga qo‘shilmayman. Manening oyog‘i to‘pga qaratilgan edi, aynan o‘sha yerga Ederson boshi bilan kelishi hujumchining aybi emas. Bunday vaziyatlarda hujumchining butun e'tibori to‘pda bo‘ladi. Agar men bo‘lganimda, jarima to‘pi belgilagan va Manega xavfli o‘yin uchun sariq kartochka berardim» – dedi Klattenburg. 

Albatta, hakamning to‘g‘ri qaror qabul qilganini aytayotganlar ham bor. Qizig‘i, u «Liverpul»ning sobiq futbolchisi, televideniyeda klubning ashaddiy muxlisi sifatida tanilgan Jyeymi Karragerdir. U Mossning qaroriga to‘liq qo‘shilishini va bu vaziyatda to‘g‘ridan to‘g‘ri qizil kartochka ko‘rsatishdan boshqa chora bo‘lmaganini aytdi. 

Eslatib o‘tamiz, uchrashuvning 37-daqiqasida Jonatan Moss Sadio Manega qizil kartochka ko‘rsatdi va bu o‘yin ssenariysiga sezilarli ta'sir ko‘rsatdi. Ushbu vaziyatgacha 0:1 hisobida orqada borayotgan mehmonlar bir kishi kam bo‘lib qolgach, raqibga umuman qarshilik ko‘rsata olmadi va yakunda 0:5 hisobida mag‘lubiyatga uchradi.

{Yii::t(}

O'tkazib yuborish 6s

O'tkazib yuborish

Darvozabon to‘qnashuvdan so‘ng, maydonni jarohat bilan tark etdi.

Odatda, to‘g‘ridan-to‘g‘ri ko‘rsatilgan qizil kartochkadan so‘ng, futbolchi ikki o‘yinga diskvalifikatsiya qilinadi. Ammo hali Sadio Manening nechta o‘yinni o‘tkazib yuborishi ma'lum emas.

O‘yindan keyin Sadio Mane ijtimoiy tarmoqlarda vaziyatdan afsusda ekanini yozib,  Edersondan uzr so‘radi.