Toshkentning qaysi tumanlarida kichik sanoat zonalari tashkil etiladi?

Avval xabar berilganidek, O‘zbekiston Respublikasi Prezidentining “Toshkent shahrida kichik sanoat zonalarni tashkil etish to‘g‘risida”gi qarori e'lon qilindi.

Unga ko‘ra, Toshkent shahrida Mirzo-Ulug‘bek kichik sanoat zonasi, Olmazor kichik sanoat zonasi, Mirobod kichik sanoat zonasi, Chilonzor kichik sanoat zonasi va Bektemir kichik sanoat zonasi tashkil etilmoqda.

KSZ hududida joylashgan ishlab chiqarish maydonlari va yer uchastkalari tadbirkorlik sub'yektlariga 10 yilga uzoq muddatli ijaraga beriladi, keyinchalik u tegishli kelishuvlar bajarilsa yana 10 yilga cho‘zdiriladi.

Bundan tashqari, qaror bilan Toshkent shahridagi kichik sanoat zonalarining Kafolat jamg‘armasi tashkil etiladi. Uni tashkil etishda O‘zbekiston tiklanish va taraqqiyot jamg‘armasining 50 mln AQSh dollari miqdoridagi bir martalik puli, xalqaro moliya institutlari, xorijiy hukumat tashkilotlari va donorlar mablag‘lari hamda qonunchilik bilan taqiqlanmagan boshqa manbalardan foydalaniladi.

Qarorga ko‘ra, Kafolat jamg‘armasi kichik sanoat zonalari ishtirokchilariga tijorat banklari kreditlarining garov bilan qoplanmagan qismini ta'minlaydi

Ta'minlanish ishlab chiqarilayotgan mahsulotning mahalliylashtirish darajasi yil davomida 60 foizdan kam bo‘lmasa va eksport hajmi ishlab chiqarilayotgan mahsulotning umumiy miqdoridan 10 foizga kam bo‘lmasa taqdim etiladi.