Jizzaxda Sharof Rashidov nomidagi xiyobon barpo etiladi

Prezident Jizzax shahrining bosh rejasi asosida amalga oshirilishi rejalashtirilgan bunyodkorlik loyihalari bilan tanishdi. 

O‘zA xabariga ko‘ra, davlat rahbariga Sharof Rashidov, Hamid Olimjon va Zulfiya xiyobonlarini barpo etish loyihalari ham namoyish etilgan. 

Shavkat Mirziyoyev 2016 yil 18 noyabrda Jizzax viloyati saylovchilari bilan uchrashuvda xalqning fidoyi farzandi Sharof Rashidov tavalludining 100 yilligini nishonlash, u kishi tug‘ilib o‘sgan Jizzax zaminida yodgorlik majmuasi barpo etish taklifini bildirgan edi.

Shavkat Mirziyoyev: «Sharof Rashidovni ko‘klarga ko‘targan, o‘limidan so‘ng uni qoralagan tuzum adolatli edimi?»

Ushbu tashabbusning ijobati sifatida Jizzax tumani Sharof Rashidov tumani deb nomlandi.

2017 yil 27 mart kuni Prezidentning «Atoqli davlat arbobi va yozuvchi Sharof Rashidov tavalludining 100 yilligini nishonlash to‘g‘risida»gi qarori qabul qilingandi.

Bugungi kunda bu borada izchil ishlar amalga oshirilmoqda. Jizzax shahrida Sharof Rashidov xiyoboni barpo etilmoqda. Bu yerda Sharof Rashidov haykali o‘rnatilib, atrofida bog‘ yaratiladi. Ushbu xiyobon shu yil noyabr oyida ochiladi. 

Hamid Olimjon va Zulfiya xiyobonini barpo etish, mazmun-mohiyatini boyitish, ularning maktablarini tashkil etish yuzasidan ham ko‘rsatmalar berildi.