Janubiy Koreya artilleriyaga qarshi yangi radarini namoyish qildi

Janubiy Koreya KXDR artilleriya pozitsiyalarini aniqlash uchun harakatlanuvchi radar qurilmasining takomillashgan namunasini ishlab chiqdi. Bu haqda Koreya qurol-yarog‘lar xaridi bo‘yicha boshqarmasi ma'lum qildi. 

Unga ko‘ra, 2011 yil noyabr oyidan beri 54 milliard Janubiy Koreya voni (50 mln AQSh dollariga yaqin) sarflangan yangi tizim 2018 yilda jangovar safga qabul qilinadi. 

"Aprel oyida o‘tkazilgan so‘nggi sinovda tizim qurolli kuchlarning barcha operativ topshiriqlarini bajardi hamda u jangovar harakatlarga mos, degan xulosaga kelindi", — deyiladi boshqarma xabarida. Unga ko‘ra, yangi radar qurilmasi Seulni KXDRning uzoq masofani nishonga oladigan artilleriyasidan himoyalash va ularni yo‘q qilishda markaziy o‘rin tutadi. 

Ayni vaqtda, Janubiy Koreyada SAAB kompaniyasi ishlab chiqqan ARTHUR-K radari mavjud. Biroq, yangi mahalliy radiolokatsiya tizimi qamrovi va taktik tavsiflariga ko‘ra, undan 30-40 foizga ustundir. 

Seul ikki Koreya davlatini ajratib turuvchi hududdan avtomobilda bir soatlik uzoqlikda joylashgan.