"Vikipediya"da 2016 yilda eng ko‘p tahrir qilingan maqolalar aniqlandi

"Vikipediya" 2016 yilda eng ko‘p tahrir qilingan maqolalar ro‘yxatini taqdim qildi. Bu haqda Digital Trends xabar bermoqda. 

Internet-resurs ma'lumotlariga ko‘ra, 2016 yilda hayotdan ko‘z yumgan mashhur odamlar: qo‘shiqchi Devid Boui, bokschi Muhammad Ali, fazogir Jon Glenn va boshqalar haqidagi maqolalar eng ko‘p tahrir qilingan. Umumiy holda "2016 yilda vafot etganlar" toifasidagi materiallar 18230 marta o‘zgarishlarga uchragan.

Keyingi 4 ta o‘rinni siyosiy voqealar bilan bog‘liq maqolalar egallagan. Misol uchun, Donald Tramp haqidagi maqola 8933 marta tahrir qilingan. Shuningdek, bu ro‘yxatga "AQShdagi prezident saylovlari", "Xillari Klinton prezidentlik kampaniyasini qo‘llab-quvvatlash" va "Respublikachilar partiyasi "prezidentlik" praymerizlari" maqolalari kirdi.

Bundan keyin reytingda Orlandodagi Pulse klubida sodir etilgan otishma haqidagi maqola kelmoqda (5540 marta tuzatish). 7-o‘rinni Argentinadagi eng uzoq davom etgan raqs musobaqasining oxirgi mavsumiga bag‘ishlangan "Bailando 2015" nomli maqola egallagan (5432 marta tuzatish).

E'tiborlisi, 10-o‘rinni "Janubiy Koreya musiqasi 2016" maqolasi (5074 marta tuzatish), 12-o‘rinni esa rassom Vinsent Van Gog haqidagi maqola (3551 marta tuzatish) egallagan.