Уэлс Ўзбекистонда йирик давлат компанияларини хусусийлаштиришда қатнашмоқчи

Бизнес-форумда Уэлс Тараққиёт банки, Таълим ҳамкорлиги ташкилоти (WEPco), Савдо палатаси ҳамда United Concrete Canvas, Deploy, KPX Entertainment Technology, Capital Law сингари етакчи компаниялар раҳбарлари ва вакиллари қатнашди.

Форумда республикада қайта тикланадиган энергетика, кимё саноати, металлургия, электротехника, фармацевтика, озиқ-овқат саноати ва таълим соҳаларида аниқ инвестициявий лойиҳалар бўйича тақдимотлар ўтказилди.

Хориж томони сўнгги йилларда Ўзбекистонда инвестициявий муҳит сезиларли даражада яхшиланганини, халқаро компанияларнинг мамлакатда бизнес юритишга қизиқиши ортиб бораётганини таъкидлади. Шунингдек, молия-банк, таълим, атроф-муҳитни муҳофаза қилиш, йирик давлат компанияларнинг хусусийлаштириш жараёнида қатнашишга қизиқиш билдирилди.

Бизнес-форум якунида Уэлс ва Ўзбекистон ҳудудлари ўртасида ҳамкорлик алоқаларини ўрнатиш ҳамда юқорида кўрсатилган соҳаларда аниқ лойиҳаларни ишлаб чиқиш бўйича келишувга эришилди.