Будапешт: Европа Иттифоқи бюджетининг 20 фоизи Киевга кетади

Украина Европа Иттифоқи янги бюджетининг тахминан 20 фоизини олади, деди Венгриянинг Европа ишлари бўйича вазири Янош Бока DW мухбири билан суҳбатда. Унинг сўзларига кўра, расмий Будапешт Еврокомиссиянинг 2028-2034 йилларга мўлжалланган янги бюджет бўйича таклифини ўрганиб чиқиб, шундай хулосага келган.

«Биз дастлабки таҳлил ўтказдик ва хулосага келдикки, бу таклифга кўра, Украина нафақат Украина жамғармасидан маблағ олади, балки тўғридан тўғри ёки билвосита ушбу етти йиллик давр учун Европа Иттифоқи бюджетининг тахминан 20 фоизини олади. Бу шуни англатадики, бюджетдаги ҳар бешинчи евро тўғридан тўғри ёки билвосита Украинага кетади. Мен буни мантиқий эмас деб ҳисоблайман», деди у.

Венгрия ҳукумати қандай қилиб бундай хулосага келгани ҳақида сўралганда, у Украина жамғармасидан ажратиладиган 100 миллиард евродан ташқари, Киев Европа тинчлик жамғармасидан фойдаланишини, унинг миқдори икки баравар кўпайтирилиб, 31 миллиард еврога етиши ва «бу маблағларнинг катта қисми Украинага йўналтирилишини» тушунтирди. DW мухбирининг Венгрия ушбу жамғармани блоклаётгани ҳақидаги сўзларига жавобан, Бока гап амалиёт эмас, балки Европа комиссиясининг таклифи ҳақида кетаётганини айтди.

Бундан ташқари, Будапешт ҳисоб-китобларига кўра, мудофаа саноати бюджети 5 баробар оширилди, унинг асосий мақсадларидан бири Украина ва Украина мудофаа саноатини қўллаб-қувватлашдир. «Шунинг учун, мен бу пулнинг катта қисми ҳам Украинага кетишини кутяпман», деди у. «Европа Иттифоқининг Global Europe ташқи сиёсат жамғармаси ҳам Украина билан боғлиқ масалаларни молиялаштиришга имкон беради. Қўшимча кредит линиясини яратиш кўзда тутилган, бу Украинани кредитлар орқали молиялаштириш нуқтайи назаридан чексиз имкониятдир».