Алиевнинг Украинага илтифотидан кейин Z-каналлар Озарбойжон билан урушга тайёрланишга чақира бошлади

Озарбойжон президенти Илҳом Алиев яна бир бор Украинани қўллаб-қувватлади.

Шушадаги медиафорумда Алиев украиналик журналист томонидан берилган ноодатий совғани қабул қилиб олди. Бу Украина қуролли кучларининг жанговар бригадалари шевронлари жойлаштирилган кичик стенд эди. Журналист бу совға «Украинанинг энг қимматбаҳо нарсаси» эканини айтди. Бунга жавобан Алиев миннатдорчилик билдирди ва «шу руҳда давом этиш»га чақирди.

«Сизга катта раҳмат. Қилаётган ишларингиз учун раҳмат. Шундай давом этинг», – деган Озарбойжон президенти.

Аввалроқ Алиевдан украиналик блогер Дмитрий Гордон «ғолиб миллат раҳбари сифатида Украина ва украинларга қандай маслаҳатлар бера олиши»ни сўраганди. Озарбойжон президенти «ҳеч қачон таслим бўлмаслик ва ҳеч қачон ҳудудий яхлитлиги бузилишини тан олмаслик» кераклигини айтганди. У Арманистондан Қорабоғни қайтариб олган Озарбойжонни мисол қилиб келтирган, Озарбожон БМТ Хавфсизлик кенгаши қарорини кутмасдан, вазиятни ўз қўлига олиб, ҳудуд устидан назоратини тиклагани ҳақида гапирганди.

«Ҳеч қачон оккупацияга рози бўлманг – бу асосий маслаҳат. Биз ҳам шундай қилдик», – деганди Алиев.

У шу чиқиши давомида Боку Azerbaijan Airlines самолёти ҳалокати бўйича Россияга қарши халқаро судларга мурожаат қилиш учун ҳужжатларни тайёрлаётганини ҳам айтиб ўтди.

Z-каналларнинг фиғони фалакка чиқди

Россиядаги ҳарбий мавзуга ихтисослашган телеграм-каналлар эса Илҳом Алиевнинг бу баёнотларини оғриқли қабул қилишди ва Боку «Украина изидан кетаётгани», Озарбойжон билан можаро «муқаррарлиги» ҳақида ёза бошлашди.

Қатор Z-каналлар Озарбойжон билан эҳимолий урушга тайёрланишга чақирмоқда. Ҳарбийлашган блогерлардан бири Алексей Живов (113 минг обуначаси бор) Озарбойжон президентининг сўзларини «очиқчасига душманлик» деб атади ва «Каспий тез орада яна бир ҳарбий ҳаракатлар театрига айланиши мумкинлиги» ҳақида ёзди.

«Zаписки Vетерана» (321 минг обунчаси бор) канали «Боку шиддат билан НАТО филиалига айланаётгани ва онгли равишда Украина изидан кетаётгани»ни ёзди. Канал муаллифлари Озарбойжоннинг халқаро координата тизимига ўтишини (Алиевнинг тегишли фармони шанба куни имзоланган) геосиёсий оғиш деб баҳолади ва бунда «Озарбойжоннинг Россия билан урушга тайёрланаётгани ҳақидаги яширин сигнал»ни кўришди.

«WarGonzo» канали (898 минг обуначиси бор) муаллифи Семён Пегов Боку билан можаро «муқарарлиги»ни билдирди. «Озарбойжон очиқчасига русофоб позициясини танлади. Ва биз бу можарога қанча эрта тайёрланишни бошласак, шунча яхши бўлади», – деган Пегов.

Яна бир Z-блогер Юрий Подоляк (3,1 млн обуначи) Алиев «эскалация линиясини танлагани» ва уни фақат «куч билан тўхтатиш мумкин»лигини таъкидлади. «Озарбойжон давлати бугунги кунда Россия учун нафақат нодўст давлат, балки геосиёсий душман ҳамдир», – деб ёзади Подоляк. Уруш тарафдори бўлган блогер Россия Ташқи ишлар вазирлигини «четга чиқиб, карталарни дастлаб мамлакат Ички ишлар вазирлигига, кейин эса, агар керак бўлса, Мудофаа вазирлигига бериш»га чақирди.

«Поздняков 3.0» телеграм-канали (188 минг обуначиси бор) шундай чақириқ акс этган пост жойлади: «Боку марказига „Орешник“».

Шу билан бирга, айрим каналлар вазиятга эҳтиёткорлик билан ёндашмоқда. Масалан, «Архангел спецназа» (1,1 млн обуначиси бор) муносабатларни қайта кўриб чиқиш кераклигини айтди, «Два-майора» (1,2 млн обуначиси бор) эса Озарбойжондан қишлоқ хўжалиги маҳсулотлари импортни тўхтатишни таклиф қилди. «Чегарадаги помидор ташувчи юк машиналари иссиқдан сасишни бошласин ва бу ҳидни Бокуда эшитишсин», – деб ёзди канал муаллифлари.

Муносабатлар ёмонлашиши

2024 йил 25 декабрда Azerbaijan Airlines авиакомпаниясининг Embraer 190 русумли самолёти Қозоғистоннинг Оқтов шаҳри яқинида қулаб тушганди. Авиаҳалокат оқибатида 38 киши қурбон бўлган. Ҳалокатнинг дастлабки текшируви у Грозний шаҳри осмонида эканида Россия ракетаси зарбасига учраганини кўрсатганди. Ўшанда Чеченистон пойтахтига украин дронлари ҳужумини қайтариш бўйича амалиёт ўтказилаётганди.

Ҳалокатдан кейин Озарбойжон президенти Илҳом Алиев Россиядан айбдорларни жазолаш ва айбга иқрор бўлишни талаб қилди. Москва бу талабларни бажармади.

Россия ва Озарбойжон муносабатларида навбатдаги инқироз 2025 йил 27 июн куни Екатеринбургдаги рейд чоғида икки озарбойжонлик вафот этиши ортидан юзага келди.

Москва кучишлатар тузилмаларнинг рейд вақтида ҳаракатлари қонун доирасида бўлганини даъво қилган. Боку эса Москва Екатеринбургдаги рейд ноқонуний бўлганини тан олиш ҳамда Зияддин ва Ҳусайн Сафаровнинг ўлимини текширишни талаб қилмоқда. Озарбойжонда ҳам Россиянинг 13 фуқароси қўлга олинган.