Путин санкцияларга қарамай урушни давом эттирмоқчи

Россия президенти Владимир Путин АҚШ президенти Доналд Трампнинг санкцияларни кучайтириш ҳақидаги таҳдидларига қарамай, Ғарб ўз шартларига рози бўлмагунича жанг қилишда давом этмоқчи. Бу ҳақда Reuters Кремлга яқин бўлган уч манбага асосланиб хабар қилган.

Агентлик суҳбатдошларига кўра, Путин Россия иқтисодиёти ва армияси Ғарб томонидан қўлланувчи ҳар қандай қўшимча санкциялар, жумладан, Россия нефтини харид қилувчи мамлакатларнинг маҳсулотларига бож қўйилишига ҳам дош бера олади, деб ҳисоблайди.

«Путиннинг фикрича, ҳеч ким, жумладан, америкаликлар ҳам у билан Украинадаги вазиятни тинч йўл билан ҳал қилиш тафсилотларини жиддий муҳокама қилмаган. Шу боис, у ўзи хоҳлаган нарсага эришмагунча давом этишга бел боғлаган», – дейди Reuters суҳбатдошларидан бири. Унинг қўшимча қилишича, Трамп билан телефон мулоқотлари ва унинг махсус вакили Стив Уиткоффнинг Россияга ташрифларига қарамай, Россия президенти шу пайтгача ҳеч ким у билан тинчлик шартларини муҳокама қилмаган деб ҳисоблайди.

Путин НАТОнинг шарққа кенгаймаслиги, Украинанинг бетарафлиги, русийзабон аҳоли ҳуқуқларини ҳимоя қилиш ва Украинанинг аннекция қилинган бешта ҳудуди Россия таркибига киришини тан олиш бўйича юридик мажбуриятларни талаб қилмоқда. Шу билан бирга, у Украина хавфсизлиги кафолатларини муҳокама қилишга тайёр, дейилади Reuters материалида.

Агентлик манбалари, шунингдек, Путин Россия жанг майдонида устунликка эга эканлигини тушунишини ва шунинг учун янги ҳудудларни эгаллашга интилиши мумкинлигини таъкидлади. «Иштаҳа овқат маҳали келади», – деди Reuters суҳбатдошларидан бири. Яна бир манбанинг айтишича, Москванинг кейинги ҳаракатлари Украинанинг кучига боғлиқ бўлади – агар Россия армияси қаттиқ қаршиликка дуч келса, ҳужум тўхташи мумкин. Аммо жиддий қаршилик кўрсатилмаса, унда «Днипро, Суми ва Харкивга янада кенгроқ ҳужум бўлиши мумкин».

Манбалардан бири Трампда Россия президентига таъсир ўтказиш воситалари кўп эмаслигини таъкидлаган. «Путин Трамп – ёқимсиз хатти-ҳаракатларни амалга ошириши мумкин бўлган, ҳаракатларини олдиндан айтиб бўлмайдиган одамлигини тушунади. Ва унинг қаҳрини келтирмаслик учун манёвр қилади», – дея қўшимча қилди агентлик суҳбатдоши.