Европа грандлари бу форвардлар учун навбатда. Ким қаерга ўтади?

Кучли форвардлар – трансфер бозоридаги энг кўп қизиқишларга сабаб бўлувчи «маҳсулот». Бу ёзда кўплаб шов-шувли трансферлар амалга оширилиши кутилмоқда. Қуйида топ-клублар ўртасида кучли рақобат келтириб чиқараётган ҳужумчилар ҳақида маълумотлар жамланди. «Челси» аллақачон Лиам Делап билан ҳужум чизиғини мустаҳкамлади, Жонатан Дэвид эркин агент сифатида «Ювентус»га бориб қўшилди. Энди навбатда кимлар?

Александер Исак, 25 ёш («Нюкасл»)

2024/2025 йиллар мавсумидаги статистикаси: 42 ўйинда 27+6
Трансфер қиймати: 120 млн евро
Даъвогарлар: «Ливерпул», «Арсенал»

2022 йил ёзида «Нюкасл» Исак учун «Реал Сосиедад»га 70 млн евро тўлаганида, бу керагидан ортиқ маблағдек кўринганди. Ўшанда унинг олдинги мавсумдаги кўрсаткичлари юқори эмас, Ла Лиганинг 17 ўйинида олтитагина гол урганди. Якунда эса «қарғалар»нинг танлови ўзини оқлади. Швециялик ҳужумчи жамоа учун 109 ўйинда 62 гол ва 11 голли пас амалга оширди. АПЛнинг якунланган мавсумида ундан кўпроқ голни фақат Салоҳ урди (29 га қарши 23). FourFourTwo портали Александерни жаҳоннинг энг кучли форвардлари рейтингида тўртинчи ўринга қўйган: Мбаппе, Левандовски ва Дембеледан кейин. Ва энди Исак янада каттароқ жамоага ўтишга тайёр.

The Telegraph ушбу ҳужумчи «Ливерпул»нинг асосий нишони экани ҳақида ёзган. «Ливерпул» аллақачон Жереми Фримпонг, Милош Керкез ва яримҳимоячи Флориан Вирцни сотиб олди, бу футболчилар учун жами 200 миллион евродан кўпроқ маблағ сарфланди. Аммо трансфер машинаси тўхтамоқчи эмас. The Athletic ҳам мерсисайдликлар Исакка қизиқишини йўқотмагани ҳақида ёзган.

Асосий муаммо – нархда. «Нюкасл» швед ҳужумчисини 150 миллион евродан камига сотмаслиги маълум қилинган. Қолаверса, жамоа янги мавсумда Чемпионлар лигасида иштирок этиши футболчини ҳам қониқтиради.

Журналист Бен Жейкобс Флориан Вирц катта маблағга харид қилингани қизиллар учун тўсиқ бўла олмаслигини билдирган: «Улар бир ёз ичида иккинчи марта Буюк Британиянинг трансфер рекордини янгилашга тайёр ва агар Исакни олишнинг имкони бўлса, уни сотиб олишга қатъий қарор қилишган – ҳатто рекорд нархга ҳам».

Аввалроқ бошқа бир инсайдер Дэвид Орнштейн Исакка «Челси», «Барселона» ва «Арсенал» ҳам қизиқаётгани ҳақида хабар қилганди. Каталонияликлар молиявий муаммолари туфайли бундай катта харидни ўзига эп кўра олиши даргумон. «Кўклар» эса аллақачон Делапни сотиб олишди, Жексон ҳам ҳеч қаерга кетмоқчи эмас. «Канонирлар»га эса Исакдек ҳужумчи жуда зарур. Аммо жамоада бошқа вариантлар ҳам бор.

Виктор Дёкереш, 27 ёш («Спортинг»)

2024/2025 йиллар мавсумидаги статистикаси: 52 ўйинда 54+13
Трансфер қиймати: 100 млн евро
Даъвогарлар: «Арсенал», «Ювентус», «Манчестер Юнайтед»

Дёкереш Португалия чемпионатида шов-шув кўтарди ва 39 гол уриб, «Олтин бутса» учун жиддий рақобат кўрсатди. Агар коэффициентлар бўйича мураккаблик бўлмаганида, мукофот уники бўларди: лекин чемпионатлар даражасидаги фарқ туфайли унинг ҳар бир голига 1,5, Мбаппеникига эса 2,0 коэффициент ҳисобланди ва якунда франциялик ҳужумчининг 31 голи юқори баҳоланди. Ва барибир швециялик ҳужумчининг статистикаси камёб. Чемпионат даражаси туфайли ҳам унга талабгорлар кўп бўлмади ва «Спортинг» ҳам унга жуда катта нарх қўя олмади.

Футболчига аввалдан «Арсенал» томонидан қизиқиш мавжуд эди, аммо лондонликларда вариантлар кўп бўлиб, унга устувор мақсад сифатида қаралмади. Орада Corriere dello Serra «Ювентус» 70 млн евролик таклиф билан чиқаётгани ҳақида хабар тарқалди. Кейин эса Дёкереш «Манчестер Юнайтед» вариантидан бош тортгани — фақат ЕЧЛда қатнашадиган жамоа сафига ўтишни хоҳлаётгани хабар қилинди. Сўнгги кунларда у клуб раҳбариятига ултиматум қўйиб, ўзини «Арсенал»га сотишни талаб қилаётгани, кейинги мавсумда барибир клуб сафида ўйнамаслигини маълум қилгани ҳақида хабарлар тарқалди. Лондонликлар ҳам бошқа номзодлар билан (Исак, Шешко) келиша олмагач, ушбу вариантга қайтди. Ишончли манбалар тасдиқлаётган сўнгги хабарларга кўра, футболчи «Арсенал»га ўтиши масаласи ҳал бўлган. «Спортинг» 80 миллион евро сўраётганди, Лондон клуби спорт директори Андреа Берта эса нархни 65 миллион еврогача туширишга ҳаракат қилмоқда. 

Бенямин Шешко, 22 ёш («РБ Лейпциг»)

2024/2025 йиллар мавсумидаги статистикаси: 45 ўйинда 21+6
Трансфер қиймати: 70 млн евро
Даъвогарлар: «Арсенал», «Бавария», «Манчестер Юнайтед»

Словениялик ҳужумчи «Ред Булл» иерархияси бўйлаб муваффақиятли ҳаракатланди: Австрияда 123 ўйинда 51+17 кўрсаткичга эришди, «Залцбург»дан «Лейпциг»га ўтиб, 87 ўйинда 39+8 кўрсаткич қайд этди. Бу эса гранд клублар қизиқишига сабаб бўлди. Хусусан, «Арсенал» устози Микел Артета уни асосий нишон сифатида белгилаб олганди. 

Бундан ташқари, «Бавария» уни Ҳарри Кейнга ўринбосар сифатида кўриб чиқмоқда. Bild агар мюнхенликлар Шешкони сафига қўшиб оладиган бўлса, Кейн ҳужумчи ортидаги позицияга ўтиши мумкинлиги ҳақида ёзди.

Шунингдек, журналист Кристиан Фалк «Манчестер Юнайтед» томонидан қизиқиш мавжудлиги ҳақида хабар берган: манкунианликларда бу футболчи учун курашда кичик устунлик бор, жамоа скаутлар бўлимини бошқараётган Кристофер Вивелл ўз вақтида словениялик футболчини «Залцбург»га олиб келганди ва айнан у туфайли футболчи топ-даражага чиқишга эришди. Рубен Аморим ҳам Зиркзее ва Ҳойлунддан (у «Интер»га ижарага берилиши мумкин) мамнун эмаслиги тайин, шу туфайли юқори савиядаги тўпурар ҳужумчига эҳтиёж сезмоқда.

Сўнгги хабарларга кўра, «Лейпциг» клуби спорт директори Марсел Шефер 90 млн евродан кам таклифлар бўйича музокара ўтказилмаслигини маълум қилган. Шундан кейин «Арсенал» футболчи учун курашдан чиққан ва бор эътиборини Виктор Дёкерешга қаратган.

Родриго, 24 ёш («Реал»)

2024/2025 йиллар мавсумидаги статистикаси: ла лигада 30 ўйинда 6+6
Трансфер қиймати: 90 млн евро
Даъвогарлар: «Арсенал», «Манчестер Сити», «ПСЖ»

Ўтган мавсумда чемпионлик курашини «Ливерпул»га бой берган «Арсенал» ёзги трансферларда ҳам ушбу клуб билан рақобатда ортда қолмоқда. Жамоа фақат сўнгги кунларда захира дарвозабони Кепа Аррисабалага ҳамда таянч яримҳимоячиси Мартин Субименди трансферини эълон қилди. Лекин клуб ёзнинг илк кунлариданоқ таркибни мустаҳкамлаш устида иш олиб бормоқда. Жамоани тарк этган яримҳимоячилар Жоржинио ва Томас Парти ўрнига Субименди билан бирга «Брентфорд» сардори Кристиан Нергор ҳам олиб келиниши кутилмоқда.

Лондонликлар кейинги мавсумда АПЛ ва ЕЧЛ ғолиблиги учун курашишга бел боғлаган. Бунинг учун эса яримҳимоядан ташқари ҳужум чизиғини ҳам кучайтириш талаб этилади. Клуб марказий ҳужумчи позициясини Виктор Дёкереш билан ёпмоқда, ўнг қанотда Сакага ўринбосар сифатида «Челси» асосий таркибидан тушиб қолган Нони Мадуэке номзоди кўриб чиқилмоқда, ҳужумчи орти позициясига «Кристал Пэлас» етакчиси Эберечи Эзе олиниши мумкин.

Жамоадаги яна бир муаммоли чизиқ эса чап қанот вингери бўлиб қолмоқда. Ўтган мавсумда бу позицияда Мартинелли ва Троссар у қадар ишончли ўйнай олмади. Энди бу муаммо «Реал»да асосий таркибдан тушиб қолган Родриго билан ҳал қилиниши мумкин. Ушбу бразилиялик футболчи клублар ўртасидаги жаҳон чемпионатида захира футболчисига айланди, мадридликлар шу ёзда унинг қанотига «Ривер Плейт»дан Франко Мастантуонони олиб келади ва футболчининг асосий таркибга кириши янада қийинлашади.

Испаниядаги AS нашри клублар ўртасидаги жаҳон чемпионатидан кейин «Арсенал» Родриго бўйича «Реал» билан музокараларни бошлаши ҳақида хабар қилган. The Athletic эса шундай қўшимча қилган: бразилиялик футболчи сотувга қўйилади, у жамоанинг янги бош мураббийи Хаби Алонсонинг режаларидан ўрин олмаган. «Арсенал» ушбу футболчи трансфери учун 90 млн евродан ортиқ маблағ сарфлашга тайёр. «Реал» унинг трансферидан тушган маблағларни Алонсонинг янги яримҳимоячилар бўйича талабларини қондиришга йўналтиришни кўзлаган.

Жон Дуран, 21 ёш («Ан-Наср»)

2024/2025 йиллар мавсумидаги статистикаси: 47 ўйинда 24 гол
Трансфер қиймати: 35 млн евро
Даъвогарлар: «Наполи», «Фенербаҳче»

Рўйхатдаги энг кутилмаган трансфер лоти. Ярим йил олдин «Ан-Наср» колумбиялик ёш ҳужумчи учун 77 млн евро тўлаганди. Футболчи ҳам янги клубга ўтганидан бахтиёр эди: «Худди FIFA ўйинида карьера режимида ўйнаётгандекман. Мен голларимни Криштиану Роналду билан нишонлайман!» Аммо яқинда Arriyadiyah шундай хабар тарқатди: «саудияликлар клуби руҳий ҳолатига ва техник барқарорлигига таъсир қилаётган шахсий муаммолари туфайли Дуранни ижарага беришига тўғри келади». Шу билан бирга, 22 млн евро миқдоридаги йиллик маош бундай трансфер имконини қийинлаштиради.

Туркиялик журналист Серкан Ҳамзаўғлининг ёзишича, Дураннинг ўзи «Фенербаҳче»га ижара асосида ўтишга қарши эмас. Унинг ҳамкасби Яғиз Сабунчиўғли эса бошқа клуб номини тилга олган: «Наполи» «Ан-Наср»га расмий таклиф билан чиқмоқчи. Бу клубда Жон голларини Лукаку билан нишонлаши мумкин бўлади.

Адемола Лукман, 27 ёш («Аталанта»)

2024/2025 йиллар мавсумидаги статистикаси: 40 ўйинда 20+7 гол
Трансфер қиймати: 60 млн евро
Даъвогарлар: «Наполи», «Атлетико», «Арсенал»

Нигериялик форвард Бергамода ажойиб уч мавсум ўтказди ва фаолиятида янги қадам ташлаш арафасида. Уни ўз сафида кўришни истайдиган жамоалар етарлича, «Наполи» ва «Атлетико» аллақачон Лукман учун аукцион бошлашган. Нима бўлганда ҳам, 112 ўйиндаги 52+25 кўрсаткичи — гранд жамоалар назардан четда қолдирадиган статистика эмас. Қолаверса, Адемола универсал футболчи: ҳужумдаги исталган позицияда ўйнай олади. Corriere dello Sport маълумотига кўра, «Аталанта» футболчини 60 млн еврога сотишга тайёр. Агар нигериялик футболчи Неаполга ўтадиган бўлса, Лукаку билан Лук-Лук боғламини ҳосил қилиши мумкин.

Шу билан бирга, бу ёзда трансфер бозоридаги кўплаб ҳужумчилар қатори ушбу футболчи ҳам «Арсенал» билан боғланмоқда. TEAMtalk ва журналист Флориан Плеттенберг Лукман Родриго, Мбеумо ва Байно-Гиттенс қаторида «канонирлар» шорт-листида эканини хабар қилганди. Ушбу тўртликдаги футболчиларнинг иккисига аллақачон бошқа жамоалар жиддий рақобатлашмоқда, Брайан «МЮ» ва «Тоттенҳэм»дан бирига ўтиши ойдинлашмоқда, Жейми эса «Челси» футболчисига айланиб бўлди.

Мойзе Кин, 25 ёш («Фиорентина»)

2024/2025 йиллар мавсумидаги статистикаси: 44 ўйинда 25+3 гол
Трансфер қиймати: 50 млн евро
Даъвогарлар: «Барселона», «Наполи», «Милан», «Манчестер Юнайтед», «Ал-Қодисия»

Мойзе Кин фаолиятини яна йўлга қўйиб олди. «Ювентус» ўтган йил ёзида ушбу ҳужумчисин арзимаган 13 млн еврога «Фиорентина»га қўйиб юборганди. Футболчи эса ўзини ҳисобдан чиқаришга ҳали эрта эканини намойиш этди. Эндиликда Мойзе учун навбатда турган жамоаларга қаралса, флоренцияликлар уни кейинги мавсум учун ҳам олиб қолиши даргумон. Лекин унинг сотувидан катта маблағ ишлаб олиш мумкин.

Corriere dello Sport Кинга «Наполи», «Манчестер Юнайтед», «Фенербаҳче» ва Саудиянинг «Ал-Қодисия» клубидан қизиқиш борлигини хабар қилган. La Gazzetta dello Sport эса «Барселона» футболчининг шартномасидаги 52 млн евро миқдоридаги товон пулини тўлашга тайёрлиги ҳақида ёзган. Sport Mediaset Мойзенинг истеъдодига Массимилиано Аллегрининг шахсий симпатияси борлигини хабар қилган: мураббий у билан яна бирга ишламоқчи ва «Милан»дан уни олиб беришни сўрамоқда.

Шу билан бирга, Мойзе Италия миллий жамоаси билан ЖЧ-2026 га бориш учун клубини ўзгартирмаслик ва 2029 йилга қадар амал қиладиган янги шартнома тузиш ҳақида ҳам ўйламоқда.

Уго Экитике, 23 ёш («Айнтрахт»)

2024/2025 йиллар мавсумидаги статистикаси: 48 ўйинда 22+12 гол
Трансфер қиймати: 75 млн евро
Даъвогарлар: «Челси», «Манчестер Юнайтед», «Ливерпул»

Уго Экитике ўзи кўп гол уришдан ташқари, жамоадошларига вазият яратиб беришда ҳам беназир футболчи. «Айнтрахт» бир йил олдин унинг шартномасини «ПСЖ»дан 20 миллион еврога сотиб олганди, энди бир неча баробар қимматга сотиши мумкин.

«Айнтрахт» одатда форвардларини сотиш орқали катта пул ишлайди, лекин бу клубдан кетган футболчилар янги жамоасида ўйнаб кетолмаган: Коло Муани, Йович, Андре Силва. Шу жиҳатдан, даъвогарларни клуб сўраётган 100 млн евро чўчитиб юбориши ҳам мумкин. Инсайдер Кристиан Фалк Экитике учун «Ливерпул» ва «Челси» даъвогар эканини хабар қилган. Флориан Плеттенберг «Манчестер Юнайтед»дан ҳам таклиф борлигини қўшимча қилган.

Виктор Осимҳен, 26 ёш («Наполи»)

2024/2025 йиллар мавсумидаги статистикаси: «Галатасарой» сафида 41 ўйинда 37+8 гол
Трансфер қиймати: 70 млн евро
Даъвогарлар: «Ал-Ҳилол», «Манчестер Юнайтед», «Ливерпул», «Ювентус»

Бу рўйхатга Осимҳенни қўшмай бўлмасди. Нигериялик ҳужумчи ўтган йил ёзида «Наполи» раҳбарияти билан зиддиятга борган, аммо на Саудиядаги, на Англиядаги клублар билан ҳам шартнома тузолмаганди. Якунда мавсумни ижара асосида Туркияда ўтказишга тўғри келди. Fanatik маълумотига кўра, унга яна «Ал-Ҳилол»дан жиддий қизиқиш бўлмоқда, ушбу жамоа футболчининг шартномасидаги 75 млн евролик товон пулини тўлашга тайёр. Муаммо маош миқдорида: Виктор тўртта таклифни рад этган, энди бешинчиси ҳам бор — йилига 50 млн евролик.

АПЛда Осимхенга бундай пул бермасликлари аниқ. Аммо агар ОАВга ишонилса, унга Европада қолиш учун вариантлар етарлича. Footmercato «Манчестер Юнайтед» «Наполи» билан музокаралар ўтказаётгани ва футболчи учун 12 млн евро миқдорида йиллик маош беришга тайёрлигини ёзган. TEAMtalk маълумотига кўра, «Ливерпул» ушбу футболчи трансферига Киеза ёки Нунесни қўшиш вариантини кўриб чиқмоқда. Жанлука Ди Марцио эса «Ювентус»дан қизиқиш борлигини хабар қилган. Футболчида янги клуб танлаш учун сентябргача етарлича вақт бор.