БМТ Кениядаги норозилик намойишларида фуқаролар ҳалок бўлганидан хавотирда

БМТ ИҲОКБ мустақил тергов ўтказишга чақириб, тинч намойиш ўтказиш ҳуқуқларини ҳурмат қилиш зарурлигини таъкидлади.

Фото: AP

Бирлашган Миллатлар Ташкилотининг Инсон ҳуқуқлари бўйича олий комиссари бошқармаси (ИҲОКБ) Кениядаги оммавий намойишлар чоғида ҳалок бўлганлар ва жароҳатланганлар ҳақидаги хабарлардан чуқур хавотир билдирди. Бу ҳақда бошқарма матбуот котиби Лиз Троссел баёнот берди.

«Биз Кенияда чоршанба куни намойишлар чоғида намойишчилар ва полиция ходимлари орасида кўплаб жабрланганлар қайд этилгани, шунингдек, айрим намойишчиларнинг ўлими ҳақидаги хабарлардан чуқур хавотирдамиз», деди Троссел.

Намойишчиларнинг ўқдан яралангани ҳақидаги хабарлар айниқса хавотирга солади, дейди у.

Тросселнинг таъкидлашича, бошқарма Кения мустақил полиция назорати органининг воқеа юзасидан тергов бошлаш ҳақидаги баёнотини эътиборга олган.

У одил судловни таъминлаш ва келажакда шунга ўхшаш ҳодисаларнинг олдини олиш учун тергов тезкор, ҳар томонлама, мустақил ва шаффоф бўлиши кераклигини таъкидлади.

ИҲОКБ вакили барча томонларни хотиржамлик ва вазминликка чақириб, тинч йиғилишлар ва сўз эркинлиги ҳуқуқи қонун устуворлигининг пойдевори эканлигини ва барча томонидан ҳимоя қилиниши кераклигини эслатди.

Ўтган йили солиқ ислоҳотига қарши норозиликларнинг бир йиллиги муносабати билан полиция зўравонлиги ва мамлакатдаги ёмон бошқарувга қарши намойишлар натижасида 16 киши ҳалок бўлган эди.

2024 йил 25 июн куни ўн минглаб одамлар солиқларни оширадиган қонун лойиҳасига норозилик билдириш учун кўчаларга чиқди.

Намойишлар чоғида парламент биноси эгаллаб олинди, полиция ўт очиши натижасида 60 дан ортиқ одам ҳалок бўлди.

#Кения #БМТ