Жаҳон | 14:44 / 26.06.2025
2840
3 дақиқада ўқилади

Тихановский: Озод этилишим Беларус демократик ҳаракатига туртки беради

Беларуслик сиёсатчи Сергей Тихановский озодликка чиққанидан сўнг Deutsche Welle нашрига ўзининг биринчи катта интервюсини берди.

Фото: Olga Kapustina/DW

Светлана ва Сергей Тихановскийлар Варшавада (26 июн) ва Вилнюсда (28 июн) акциялар ҳақида эълон қилди, улар давомида эр-хотин Полша ва Литвада яшовчи беларуслар билан учрашади. «Ўйлайманки, сиз бизни тез орада Германияда, кўплаб шаҳарларда ва Европанинг кўплаб пойтахтларида кўрасиз», деди Сергей Тихановский 25 июн, чоршанба куни Вилнюсда Deutsche Welle нашрига берган эксклюзив интервюсида.

Сиёсатчининг фикрича, унинг озод этилиши Беларусдаги демократик ҳаракатга туртки бериши мумкин. «Худди шундай бўлади», деди у DW мухбири Александра Богуславскаянинг саволига жавоб бериб.

Сергей Тихановский озод одам сифатида ўзининг биринчи йирик интервюсида қамоққа олингани, рафиқаси, Беларус демократик кучлари етакчиси Светлана Тихановская сўнгги беш йил ичида ўзгаргани ёки ўзгармагани ҳақида гапирди ва «Бугун Сергей Тихановский ким?» деган саволга жавоб берди.

Тўлиқ интервюни DW Беларус YouTube каналида томоша қилиш, 26 июн куни эса DW сайтида матнли версиясини ўқиш мумкин.

Беларуслик сиёсатчи, блогер ва тадбиркор Сергей Тихановский 2020 йилнинг май ойида мамлакат президентлигига ўз номзодини қўйиш истагини билдирганидан сўнг Беларусда қўлга олинган эди. Тихановский 20 йилга қамалди, кўп вақтини бир кишилик камерада ўтказди, сўнгги уч йил давомида ҳатто фарзандларидан хат ҳам олмади.

2025 йил 21 июн куни Сергей Тихановский Беларус раҳбари Александр Лукашенко ва АҚШ президентининг махсус элчиси Кит Келлог ўртасида Минскдаги учрашувидан сўнг тўсатдан қўйиб юборилди. Беларус махсус хизматлари уни Литва билан чегарага олиб борган ва у ерда америкалик дипломатларга топширган. Беш йилдан сўнг сиёсатчи Беларус демократик кучларини бошқарувчи рафиқаси Светлана Тихановская ва фарзандларини кўрди.

21 июн куни Тихановский билан бир қаторда яна 13 маҳбус озод этилди. Ҳозирда Беларус Республикасида сиёсий мотивлар билан судланган мингдан ортиқ одам панжара ортида ўтирибди.

Мавзуга оид

Эълонлар