Украина ИИВ раҳбари Россия украиналиклар ўрнига россиялик ҳарбийлар жасадини юборганини маълум қилди

Украина Ички ишлар вазирлиги раҳбари Игор Клименко Россияни Киевга ҳалок бўлган украиналик аскарлар ниқоби остида ўз ҳарбийларининг жасадларини топширганликда айблади. У ҳалок бўлган россияликлардан бирининг ҳужжатларини эълон қилди, унинг таъкидлашича, ушбу жасад алмашинув доирасида Украинага топширилган.

Эълон қилинган ҳужжатлар Александр Бугаев номига берилган. Клименко унинг жасади ёнидан топилган ҳарбий гувоҳнома, жетон ва ҳарбий қисм командирининг буйруғидан кўчирма суратларини намойиш этди. Шунингдек, вазирнинг сўзларига кўра, Россия фуқароси паспорти ва ҳарбий хизматчи гувоҳномаси талони топилган (уларнинг суратини кўрсатмаган).

Клименко марҳумнинг қариндошлари «уни қидиришни март ойининг охирида Донецк областининг Новомихайловка районида ғойиб бўлганидан кейин бошлагани»ни аниқлашга муваффақ бўлганини айтган.

«Бу Россия ўз халқига менсимай муносабатда бўлаётгани, уларнинг жасадларини украиналик ҳарбийлар жасади сифатида кўрсатаётганининг яна бир исботидир. Бу Россия учун инсон ҳаёти нақадар аҳамиятсизлигидан далолат. Ёки бу шунчаки уларнинг оилаларига тўловлардан қочишнинг бир усули. Лекин барибир пул тўлашга тўғри келади: биз бу жасадларни қайтариб беряпмиз», – деган вазир.

Топилган ҳужжатларнинг ҳақиқийлигини тасдиқловчи мустақил далиллар йўқ. Россия томони ҳалок бўлган ҳарбийсининг ҳужжатлари эълон қилиниши юзасидан изоҳ бермади.

Клименко 16 июн куни ҳам Россия Украинага ўзининг ҳалок бўлган аскарларининг жасадларини топширганини айтганди. Ўшанда у аниқ исмларни келтирмаган ва ҳужжатларни кўрсатмаган – вазир фақат Украинадаги барча қайтарилган жасадлар терговчилар ва экспертлар томонидан текширилаётгани, ҳалок бўлганларнинг шахсини тасдиқлаш учун ДНК экспертизаси ўтказилаётганини айтганди. Клименко Москва ёки «топширилган жасадлар сонини кўпайтириш ва украин экспертларининг ишини қийинлаштириш» учун, ёки «ўз одамларига одатдагидек бепарво муносабатда бўлгани туфайли» жасад қолдиқларини атайлаб аралаштириб юбораётганини таъкидлаганди.

Клименконинг бу сўзларига 19 июн куни РФ ТИВ расмий вакили Мария Захарова муносабат билдирганди. Унинг иддао қилишича, Украина ИИВ раҳбари «ўз журналистларининг бу [россиялик аскарлар жасадлари] экани қандай аниқлангани» ҳақидаги саволига жавоб бера олмаганини айтиб, бу айбловни у томондан «абракадабра» ва «иблисона ғўлдираш» деб атаганди.

Ҳалок бўлган ҳарбийларнинг жасадларини алмаштириш бўйича Россия ва Украина ўртасидаги музокараларнинг 2 июн куни Истанбулда ўтказилган раундида келишилганди. Алмашув бир неча кун давомида босқичма-босқич ўтказилган, 16 июн куни томонлар жараён якунлангани ҳақида расман хабар берилганди.

Украина алмашув доирасида Россиядан 6057 жасад қабул қилинганини маълум қилган (Россия томони бу миқдор 6060 та эканини билдирган). Ўз навбатида, Москва Киевдан 78 киши жасадини олган. Украинадагилар топширилган жасадлар сонидаги фарқ нега бу қадар катта экани ва Киев нима учун кўпроқ жасадлар бермаганини изоҳламаган.