Зеленский: Вена Россиядан болаларни қайтаришда воситачилик қилиши мумкин

Украина президенти Володимир Зеленскийнинг сўзларига кўра, Австрия Россия томонидан «ўғирлаб кетилган» украиналик болаларни ватанига қайтариш масаласида воситачи бўлиши мумкин. Бу Австрия президенти Александр Ван дер Беллен билан учрашув чоғида муҳокама қилинди, деди Украина давлати раҳбари 16 июн, душанба куни Вена шаҳрида австриялик ҳамкасби билан музокаралар якунлари бўйича ўтказилган қўшма матбуот анжуманида.

Украина раҳбари журналистларга Россия вакиллари Киевга Россия Федерациясига олиб кетилган болаларни россиялик ҳарбий асирларга алмаштиришни таклиф қилганини айтди. «Биз болаларни алмаштирмаяпмиз», деди у. «Буни тушуниш мумкин эмас, халқаро ҳуқуқ буни қабул қилмайди».

Зеленскийнинг айтишича, Ван дер Беллен ва Австрия канцлери Кристиан Штоккер билан учрашувларда, шунингдек, Украинадаги уруш туфайли ЕИнинг Россияга қарши 18-санкция пакетини тайёрлаш ва Венанинг «Россия томони билан учрашувлар учун муносиб воситачилик қилишга» тайёрлиги муҳокама қилинган. «Мамлакатимизни тиклаш ва Украина адлия тизимидан яширинган собиқ украиналик амалдорлар ва олигархлар масаласини ҳал қилишда Австриянинг ёрдамига ишонамиз», — деб ёзди Украина президенти ижтимоий тармоқларда.

Украинани қўллаб-қувватловга ишонтирган Ван дер Беллен, Австрия «ҳарбий, аммо сиёсий бетарафликка» риоя қилишини ва шунинг учун Европа Иттифоқининг Россияга қарши барча санкцияларига қўшилганини таъкидлади.