Суриялик шифокор Германияда умрбод қамоқ жазосига ҳукм қилинди

Франкфуртдаги суд шифокор Алаа М.ни қотиллик ва қийноқларда айбдор деб топиб, унинг айбининг оғирлигини таъкидлади. Бу унинг 15 йилдан кейин муддатидан олдин озод этилишини деярли имконсиз қилади.

Фото: REUTERS

Франкфурт-Майндаги олий суд суриялик шифокор Алаа М.ни инсониятга қарши кўплаб жиноятлар, жумладан, қийноқлар учун умрбод қамоқ жазосига ҳукм қилди. 16 июн, душанба куни у 2011-2012 йилларда ўз ватани Сурияда икки кишини ўлдирган ва яна тўққиз кишига оғир тан жароҳати етказганликда айбдор деб топилди.

Суднинг таъкидлашича, 40 ёшли судланувчининг айби оғир бўлиб, бу унинг 15 йилдан кейин ҳибсдан муддатидан олдин озод этилишини амалда имконсиз қилади.

Ҳукм сабабларида шифокор жиноятларни Ҳомсдаги ҳарбий ҳоспитал ва ҳарбий разведка ҳибсхонасида хизмат қилаётган вақтида содир этгани айтилади. Тергов маълумотларига кўра, у Суриянинг ўша пайтдаги ҳукмдори Башар Асад режимига номақбул шахсларни «йўқ қилиш гуруҳи» номи билан танилган шифокорлар гуруҳининг бир қисми бўлган. Унинг қурбонлари мухолифат вакиллари ҳисобланган маҳбуслар эди.

Раислик қилувчи судя Кристоф Коллернинг сўзларига кўра, Алаа М. қийноқлар пайтида ўзининг садистик тенденцияларини кўрсатган: у «ўзидан паст ва бўйсунувчи деб билган одамларга жисмоний оғриқ беришни ёқтирган». Дўқ-пўписаларга қарамай судда кўрсатма берган 50 дан ортиқ гувоҳнинг кўрсатмаларига кўра, жиноятлар орасида калтаклаш, тепиш, жароҳатлар ва тананинг турли аъзоларини, жумладан жинсий аъзоларни куйдириш кабилар ҳам бўлган.

#Германия #Сурия #шифокор