Эрондаги Фордо ядровий маркази яқинида зилзила кузатилган

Эрон Сейсмология маркази Фордо ядровий маркази яқинида магнитудаси 2,5 бўлган зилзилани қайд этган. Маълумотларга кўра, зилзиланинг эпицентри ер остида 10 километр чуқурликда жойлашган.

Фордо ядровий маркази жойлашган координаталар билан зилзила қайд этилган нуқта ўртасидаги масофа тахминан 25 километрни ташкил қилади. Ҳозирча бу зилзиланинг ядровий объект билан боғлиқлиги тўғрисида расмий маълумот мавжуд эмас.

Эслатиб ўтамиз, сўнгги кунларда Исроил ушбу марказга камида бир марта — 13 июн куни — ҳаво ҳужуми уюштирган. Халқаро атом энергияси агентлиги (МАГАТЭ)нинг маълум қилишича, ҳужумдан объектга шикаст етмаган.

Шу билан бирга, Axios портали тарқатган маълумотга кўра, Исроил АҚШдан Фордо марказини йўқ қилиш учун ёрдам сўраган. Агар объект фаолиятни давом эттирса, бу Исроилнинг Эрон ядровий дастурини тўхтатиш бўйича мақсадларига тўсқинлик қилиши мумкин.

Маълумот учун, Фордо ядровий маркази Эрон тоғли ҳудудида, ер остида жойлашган ва уранни бойитиш ишлари олиб бориладиган мажмуа ҳисобланади. Мутахассислар бу иншоотни юқори даражада ҳимояланган деб баҳолашади.