Тошкентда сунъий интеллект соҳасида мутахассислар тайёрланадиган Yandex ML School очилади

Тошкентда Yandex Uzbekistan компанияси ташаббуси билан сунъий интеллект, машинавий ўрганиш ва маълумотлар таҳлили соҳаларида юқори малакали мутахассисларни тайёрлашга қаратилган мактаб – Yandex ML School ташкил этилади. Бу ҳақда компания раҳбари Иззат Шукуров IV Тошкент халқаро инвестиция форумида маълум қилди.

Фото: Yandex Uzbekistan

Маълум қилинишича, мактаб дастури Yandex мутахассислари томонидан ишлаб чиқилган бўлиб, у олий курс талабалари ва IT соҳасида базавий билимга эга мутахассислар учун мўлжалланган. Унда иштирок этувчилар мукаммаллаштирилган машғулотлар орқали ўз малакаларини ошириши ва халқаро талабларга жавоб берадиган даражага чиқиши режалаштирилган.

Мазкур таълим маркази ҳар йили senior даражасидаги кадрларни етиштириб беради. Шу орқали сунъий интеллект ва маълумотлар билан ишлашга ихтисослашган мутахассислар қатламини шакллантириш, шу билан бирга, уларни иқтисодиётнинг турли соҳаларидаги амалиётга жалб қилиш кўзда тутилган.

Компания вакилларининг таъкидлашича, Yandex ML School — Ўзбекистонда IT-таълимни барча босқичларда ривожлантиришга қаратилган кенг қамровли стратегиянинг бир қисми.

“Биз таълим дастурларимизни яхлит тизим сифатида қурмоқдамиз — чунки тушуняпмизки, IT-таълим фақат катта экотизимнинг бир қисми бўлганида самарали бўлади. Шунинг учун биз таълим лойиҳаларини барча босқичларда амалга оширяпмиз: мактаб ўқувчилари учун дастлабки дарслар орқали уларнинг қизиқишларини қўллаб-қувватлаймиз ва ҳамфикрларни топишга ёрдам берамиз, амалдаги мутахассислар учун эса илғор дастурларни таклиф этамиз. Yandex ML School’нинг очилиши — Ўзбекистонда технологик кадрлар ва рақамли иқтисодиётни ривожлантиришдаги янги қадамдир”, — деди Yandex Uzbekistan раҳбари Иззат Шукуров.

Хабарда марказ фаолияти сунъий интеллект соҳасида мутахассислар етишмаслигини камайтириш, IT-инфратузилмани ривожлантириш ва соҳада рақобатбардош кадрлар тайёрлашга хизмат қилиши таъкидланган.

#Yandex Uzbekistan #Yandex ML School