Флорида губернатори намойишчиларни автомобилда уриб юбориш мумкинлигини айтди

Рон ДеСантис сўзларига кўра, гап фуқароларнинг автомобилларини ўраб олган ва таҳдид қилаётган намойишчилар ҳақида кетмоқда.

Фото: AP

АҚШ Флорида штати губернатори Рон ДеСантис аҳоли хавфсизликка таҳдид соладиган намойишчиларни машина билан босиб ўтишга ҳақли эканини айтди.

Губернаторнинг таъкидлашича, гап фуқароларнинг автомобилларини ўраб олган намойишчилар ҳақида кетмоқда.

«Агар уларнинг орасидан чиқиб кетиш учун машинани ҳайдаб, кимнидир уриб юборсангиз, бу сизга таҳдид қилгани учун уларнинг айби бўлади», деб тушунтирди ДеСантис ток-шоу бошловчиси Дейв Рубинга.

14 июнь, Доналд Трампнинг туғилган кунида амалдаги президент сиёсатига рози бўлмаган АҚШ аҳолиси «Қироллар йўқолсин» номли норозилик акцияси ўтказади. Митинглар аллақачон мамлакатнинг кўплаб шаҳарларида режа қилинган. CBS маълумотларига кўра, тадбирнинг ташкилий материалларида «миллий итоатсизлик куни» ибораси мавжуд. Намойишлар барча америкаликлар учун «шафқатсизлик, коррупция ва авторитаризмга қарши биргаликда бардош бериш» имконияти бўлиши ҳақида баёнот ҳам бор.

6 июнь куни Лос-Анжелесда АҚШ президенти Доналд Трампнинг иммиграция сиёсатига қарши норозилик намойишлари бошланди. Улар полиция билан тўқнашувга айланиб кетди. АҚШ ҳукумати намойишларни бостириш учун Миллий гвардия аскарларини юборди.

#АҚШ #Флорида #Рон ДеСантис