Россия думаси ягона давлат мессенжерини яратиш тўғрисидаги қонунни маъқуллади

10 июн, сешанба куни Россия Федерацияси Давлат думаси Россияда мессенжер функцияларига эга бўлган миллий кўп функцияли рақамли хизматни яратиш тўғрисидаги қонунни иккинчи ва учинчи ўқишда маъқуллади. Қайд этилишича, гап мессенжер функциялари ҳамда давлат ва тижорат хизматларини кўрсатиш хизматларини бирлаштирган илова ҳақида кетмоқда.

Ушбу илова «фуқаролар, давлат ва муниципал ҳокимият органлари ўртасида хавфсиз виртуал мулоқот қилиш имкониятини беради», дейилади Россия парламенти қуйи палатаси сайтида.

Фойдаланувчилар, хусусан, аризадаги ҳужжатларни электрон имзо билан тасдиқлаши, шунингдек, ундан шахсини, ёши ва имтиёзларга бўлган ҳуқуқларини тасдиқлаш учун фойдаланиши мумкинлиги тахмин қилинмоқда. Бундан ташқари, миллий кўп функцияли рақамли хизматда ҳозирда барча даражадаги таълим муассасалари томонидан фойдаланилаётган барча «таълим хизматлари ва чатлар» мавжуд бўлади.

Май ойи охирида «Ведомости» газетаси Россия рақамли ривожланиш вазири Мақсут Шадаевнинг мамлакат "Госуслуги" порталини Max мессенжери билан интеграция қилиш имкониятини кўриб чиқаётгани ҳақидаги баёнотини эълон қилди. "Медуза" интернет-нашри тушунтирганидек, VK томонидан ишлаб чиқилган Max лойиҳаси мессенжер, ижтимоий тармоқ, қидирув тизими, тўлов тизимини ўзида бирлаштирган ва озиқ-овқатга буюртма бериш, чипта брон қилиш ва шифокор қабулига ёзилиш мумкин бўлган Хитойнинг WeChat иловасига ўхшаб кетади. «WeChat бир неча бор цензура ва фойдаланувчиларни кузатишда айбланган», деб таъкидлайди журналистлар.